Tapitë e tokave me 7501, Lame: Si ndryshon ligji
Kreu i Kadastrës reagon pas rrëzimit të ligjit nga “Venecia”: Do ndryshojnë edhe disa nene të tjera. Çfarë ndodh me tapitë e ligjit 7501
Raporti përfundimtar i Komisionit të Venecias për ligjin "Për përfundimin e proceseve kalimtare të pronësisë" ka bërë që Qeveria të reflektojë, duke mos u mjaftuar vetëm me ndryshimin e dy neneve, por duke e riparë draftin në tërësi.
Nga Venecia ku edhe ndoqi punimet e Komisionit, kreu i Agjencisë së Kadastrës, Artan Lame, tha se do të korrigjohen edhe dy- tri pika të tjera, të cilat nuk kanë të bëjnë me "Venecian", me qëllimin e finalizimit të procesit. "Do të kalojë në komisione për t'u plotësuar, me faktin pozitiv që në maj ka hyrë në fuqi ligji për Kadastrën, që tregoi se sa gjëra rregulloi shkrirja e institucioneve. Do të preken edhe dy- tri pika të tjera nga ligji i pronave, që nuk kanë të bëjnë fare me ' Venecian', pikërisht sepse duam të përfitojmë nga rasti që do t'i jepet dora e fundit ligjit", tha Lame për A2 CNN. Kreu i Kadastrës nuk kurseu as akuzat për opozitën, e cila nuk mori pjesë në diskutime. "Për fat të keq, edhe ne kemi diskutuar dhe debatuar me veten, sepse opozita refuzoi të marrë pjesë. Ne po vazhdojmë të matemi me veten. Diskutuam midis nesh për ligjin, e bëmë. Për pika të veçanta të ligjit shkojmë po vetë dhe kërkojmë mendim më sipër", tha Lame.
TITUJT E PRONËSISË Në raportin përfundimtar, Komisioni i Venecias ngriti shqetësimin se ligji i ri i pronave, veçanërisht neni 7 dhe 9 i tij, ishin të paqartë. Zbatimi i tyre vërehej në raport, paraqiste një rrezik të lartë për shkelje të Konventës Evropiane për të drejtat e njeriut. Por cila është përmbajtja e këtyre dy neneve? Në nenin 7, parashikohej që të gjithë titujt e pronësisë së dhënë ndër vite të kalonin në skaner për të parë nëse ishin konform ligjit apo jo. Ndërkohë që përcaktoheshin edhe kriteret reja për shpalljen e titujve të vlefshëm. Konkretisht, tapitë e dhëna me ligjin 7501 do të konsideroheshin të vlefshme nëse familja ka qenë legjitimuar për të përfituar tokë sipas akteve ligjore e nënligjore për ndarjen e tokës bujqësore ose kur toka e përfituar është në territorin e një kooperative apo ndërmarrjeje bujqësore. Dhe çfarë është më e rëndësishme, toka e ndarë me AMTP, nuk ka qenë e llojit ( zërit kadastral) "truall", "rëra bregdetare" ose "plazhe". Sa i takon nenit 9, aty janë të përcaktuara procedurat që do të ndiqeshin për rastet e konstatuara me parregullsi apo ato abuzive. "Kur sipërfaqja që posedohet është më e madhe se ajo e përcaktuar në AMTP, subjekti ka të drejtë të përfitojë kalimin e pronësisë së sipërfaqes shtetërore shtesë deri në masën e njëzet për qind të sasisë së sipërfaqes të AMTPsë, sipas çmimit të përcaktuar në hartën e vlerës së pronës. Nëse poseduesi nuk e kërkon, e refuzon apo nuk shlyen vlerën, sipërfaqja shtetërore shtesë kalon për llogari të fondit të tokës bujqësore në administrim të njësisë së vetëqeverisjes vendore dhe jepet me qira nga kjo e fundit. Kur sipërfaqja që ekziston efektivisht në terren është më e vogël se ajo e përcaktuar në AMTP, Agjencia Shtetërore e Kadastrës procedon me regjistrimin e titullit për sipërfaqen që posedohet efektivisht në terren", thuhet në nenin 9.
REKOMANDIMIT Komisioni i Venecias rekomandoi rishikimin e dy neneve, përkatësisht 7 dhe 9, duke marrë parasysh që titujt bujqësorë në formën e AMTP si dhe përdorimi i vazhdueshëm i tokës me shpresën e ligjshme për t'u pajisur me AMTP përbëjnë pronë të mbrojtur. Po ashtu të parashikohen afate të sakta për mbajtësit e titujve dhe hapat themelorë proceduralë, veçanërisht kur lidhen me transferimin e titujve të pronave bujqësore. Si edhe të përcaktohen në ligj rregullat për paraqitjen e provave, aksesin në prova dhe të drejtën për t'u dëgjuar para vendimit të autoriteteve për të shpallur të pavlefshëm AMTP- në.