Zbulohet drafti për Këshillin Europian: Të hapen negociatat me kushte për Shqipërinë
NGA SPAK TE REFORMA ZGJEDHORE, 7 KUSHTET DERI NE QERSHOR 2020
Ministri i Jashtëm grek, Nikos Dhendias, i kujtoi dje Tiranës zyrtare se integrimi i Shqipërisë kalon nga mbrojtja e pakicave, ndërsa përmend si të tilla pronat e Himarës.
Në një intervistë për gazetën "Kathimerini" të së dielës, ministri i Jashtëm grek ripërsëriti se një prej kushteve kryesore që kërkon Athina ndaj Tiranës për të mbështetur fillimin e negociatave me BE- në, janë të drejtat e minoritetit grek në Shqipëri. "Flasim ndershmërisht me Shqipërinë. Kërkojmë mbrojtjen e të drejtave të pakicës greke. Ne nuk kemi pretendime për Shqipërinë. Greqia është një faktor i stabilitetit dhe sigurisë së kufijve. Sidoqoftë, Shqipëria duhet të kuptojë që ecuria e saj europiane përmban mbrojtjen e të drejtave dhe parimeve europiane, të cilat sigurojnë mbrojtjen e pakicave. Kërkon gjithashtu respektimin e pasurive të tyre. Dhe nuk ka mundësi që pasuritë në zonën bregdetare të Himarës të mos jenë objekt që duhet mbrojtur", ka deklaruar kryediplomati grek. Sipas tij, Greqia tashmë është rikthyer dhe ka për të luajtur një rol të madh dhe pozitiv në Ballkan, duke ndihmuar partnerët e saj në BE, Bullgarinë dhe Rumaninë, të cilat janë jashtë Shengenit dhe dëshirojnë të anëtarësohen. Por edhe sa i përket Ballkanit Perëndimor, Dhendias ka thënë se Greqia duhet të luajë një rol udhëheqës dhe stabilizues, në mënyrë që ky rajon të mund të fitojë një perspektivë europiane duke ushtruar edhe ndikimin e saj pozitiv, pasi, edhe pse Greqia ka qenë në krizë ekonomike, tashmë ajo është rimëkëmbur dhe PBB i saj është shumë më i madh se i disa vendeve ballkanike së bashku. I pyetur edhe për Maqedoninë e Veriut, ministri i Jashtëm grek ka deklaruar se qeveria e Shkupit duhet të respektojë detyrimet nga Marrëveshja e Prespës në mënyrë rigoroze dhe precize.
MITSOTAKIS
Kryeministri grek, Kyriakos Mitsotakis, u shpreh pak ditë më parë kundër hapjes së negociatave të Shqipërisë me Bashkimin Europian. Duket se minoriteti grek në Shqipëri është bërë pengesë për të marrë votën pro të Greqisë për hapjen e negociatave. Gjatë fjalës së tij të parë si Kryeministër i Greqisë në ceremoninë e inaugurimit të Panairit të 84- t Ndërkombëtar të Selanikut, Mitsotakis tha se pret të shohë hapa konkretë nga qeveria e Shqipërisë në lidhje me të drejtat e minoritetit grek në Shqipëri. "Greqia nuk do ta miratojë hapjen e negociatave anëtarësuese të Shqipërisë në BE në rast se unë nuk shikoj akte konkrete për heqjen e diskriminimit ndaj minoritetit etnik grek", ka deklaruar Mitsotakis ndër të tjera. Mediat greke njoftojnë për kontakte të vazhdueshme të përfaqësuesve të minoritetit grek në Shqipëri me Kryeministrin e ri të Greqisë, kryesisht kreun e PBDNJ- së dhe drejtues të shoqatës OMONIA. Kreu i qeverisë greke ka theksuar se për këtë çështje ka biseduar gjatë vizitave të tij të fundit me Presidentin francez, Makron, Kryeministrin holandez, Route, dhe Kancelaren gjermane, Merkel. "Jam plotësisht i qartë në këtë çështje, ia kam transmetuar edhe Presidentit Makron, edhe Kryeministrit holandez Route, edhe Kancelares Merkel, pasi priten bisedime në Këshillin Europian në tetor. Nuk jemi atje ende. Do të duhet të shohim ndryshime me vepra të qëndrimit të qeverisë shqiptare ndaj minoritetit kombëtar grek", u shpreh Mitsokatis. Në takimin e parë me Kryeministrin grek Mitsotakis në Nju Jork, Kryeministri Rama e cilësoi si një bashkëbisedim të hapur. "OKB, Nju Jork - Me kryeministrin e Greqisë, Kiriakos Mitsotakis. Prezantim miqësor dhe bashkëbisedim i hapur", shkruante Rama. Por kanë qenë mediat greke që kanë zbardhur qëndrimin e Kryeministrit Mitsotakis në këtë takim, në lidhje me vendimin për hapjen e negociatave mes Shqipërisë dhe Bashkimit Europian. "Në veçanti, z. Mitsotakis theksoi çështjen e vetëvendosjes dhe të drejtat pronësore të pakicës etnike Greke në Shqipëri", theksonte "Protothema".