Basha te protesta e Astirit: Jo betejë për pushtet, Rama para drejtësisë
"Jo betejë për pushtet, por për të pastruar vendin nga kriminelët"
Kryetari i Partisë Demokratike, Lulzim Basha, i është bashkuar protestës tek Unaza e Re mbrëmjen e djeshme, duke shprehur mbështetjen e opozitës për kauzën e këtyre banorëve, që kanë thuajse një vit që protestojnë.
Siç është bërë ritual i zakonshëm, edhe mbrëmë, protestuesit bashkë me krerët e PD- së të udhëhequr nga Basha, e kanë bllokuar rrugën për disa minuta, duke hedhur akuza mbi qeverinë dhe projektin e ndërtimit të kësaj pjesë të Unazës së Madhe të Tiranës. Sipas Bashës, kushtet që po vihen sot nga BE- ja për të çelur negociatat, janë thelbi i kauzës që opozita ka prej më shumë 6 muajsh. "Pa u hetuar dhe pa u çuar para drejtësisë Edi Rama dhe gjithsecili prej bashkëpunëtorëve të tij, nuk ka dhe nuk mund të ketë Shqipëri europiane. Këtë e kemi thënë prej fillimit ne demokratët, ne opozitarët, këtë sot e ka thënë me një gjuhë të qartë edhe Brukseli. Europa ka treguar se sa e drejtë dhe legjitime është kauza me të cilën nisi beteja e opozitës, beteja e Partisë Demokratike dhe aleatëve tanë. Kjo nuk është një betejë për pushtet. Kjo është betejë për t'i dhënë fund një herë e mirë jo vetëm këtij regjimi hajdutësh, kriminelësh, pa drejtësi, pa gjykata, një regjimi i cili ka asgjësuar bazën e bashkëjetesës demokratike, votën e lirë. Beteja jonë është që një herë e mirë t'i japim fund këtij tranzicioni të tmerrshëm, plot me vuajtje, dhimbje e padrejtësi dhe të hapim për të gjithë shqiptarët, pa dallim bindjeje politike, një kapitull ku politikanët të mbahen përgjegjës para ligjit, njësoj si çdo qytetar i thjeshtë dhe sa herë që ta shkelin ligjin, të marrin dënimin e merituar nga një drejtësi e pavarur. Për një Shqipëri ku kurrë më të mos cenohet vota. Vjedhja e votës, blerja e votës, shkatërrimi i zgjedhjeve me krimin e organizuar, kapja dhe blerja e medias, mbyllja e zërit të gazetarit të lirë janë tipare të një vendi autokrat dhe kriminal. Gjashtë muaj më parë, kur e nisëm këtë betejë, shumëkush nuk besoi, na talli dhe na përqeshi. Sot, Europa flet me gjuhën e qytetarëve të bashkuar që duan ndryshim, duan transformim të thellë politik dhe ekonomik, që besojnë te Shqipëria", u shpreh kryedemokrati. Lulzim Basha ka folur edhe për procesin e negociatave, duke përsëritur qëndrimin e tij se moshapja e tyre është një dështim personal i Edi Ramës dhe jo i shqiptarëve. "Europa e do Shqipërinë. Europa i do shqiptarët. Dështimi i sotëm nuk është dështimi i asnjë shqiptari të ndershëm, nuk është dështimi i Shqipërisë. Është dështimi i një njeriu që ka marrë peng Shqipërinë. Ky dështim mban vulën dhe firmën e të njëjtit njeriu që firmosi dhe vulosi aferën korruptive tek Unaza e Re, që firmosi dhe vulosi vjedhjen e zgjedhjeve", tha kreu i PD- së, Basha. Gjatë kësaj proteste është shoqëruar sërish ish- deputeti i PD- së, Klevis Balliu, i cili bashkë me disa protestues të tjerë, u vunë në pranga me akuzën e kundërshtimit të efektivëve blu gjatë këtij tubimi. Pas ndalimit të tyre, protesta e banorëve të Astirit dhe mbështetësve të PD- së është transferuar para Drejtorisë së Policisë, duke kërkuar lirimin e tyre.