Ministri gjerman: BE duhet të mbajë zotimet e marra
“Shqipëria dhe Maqedonia e Veriut i kanë përmbushur detyrat”
Gjermania paralajmëron se moshapja e negociatave me Shqipërinë dhe Maqedoninë e Veriut rrezikon të shfrytëzohet nga aktorë si Rusia, Kina apo Turqia për të shtrirë ndikimin e tyre në rajon. Sipas kryediplomatit gjerman, Michael Roth, dy vendet kanë kryer detyrat e kërkuara dhe meritojnë të shpërblehen. Franca dhe vendet e tjera europiane, javën e ardhshme duhet të heqin dorë nga skepticizmi për negociatat e anëtarësimit me Shqipërinë dhe Maqedoninë e Veriut. Në një intervistë për të përditshmen gjermane "Velt am Zontag", ministri i Jashtëm gjerman, Michael Roth, u bëri apel partnerëve të mos shkelin fjalën e dhënë. "Më 15 tetor duhet të japim sinjalin e duhur, duke i dhënë dritën jeshile hapjes së negociatave me Maqedoninë e Veriut dhe Shqipërinë. Dy vendet kanë përmbushur detyrat dhe kjo duhet shpërblyer. Kemi marrë zotimet tona dhe tani duhet t'i mbajmë", është shprehur Roth. Socialdemokrati gjerman, partia e të cilit mbështet pa kushte hapjen e negociatave për Shqipërinë dhe Maqedoninë e Veriut, thekson se përpos dëmit që do t'i sillte gjithë rajonit, refuzimi për të disatën herë mund të shfrytëzohej nga aktorë të huaj politikë. "Një tjetër kthesë do rrezikonte seriozisht kredibilitetin e BE- së, paqen dhe stabilitetin e Ballkanit Perëndimor. Po të krijojmë një vakum politik, atë do ta mbushin pa shumë ceremoni aktorë si Rusia, Kina, Turqia apo Lindja e Mesme", u shpreh Roth. Grupet Parlamentare CDU/ CSU dhe SPD miratuan pak ditë më parë dokumentin, që i thotë po hapjes së negociatave me Shqipërinë dhe Maqedoninë e Veriut, por për Shqipërinë duhen përmbushur 9 kushte. Deputetët gjermanë, megjithatë kanë vënë disa kushte shtesë për Shqipërinë, të cilat i kanë ndarë në dy etapa. Dy syresh duhen plotësuar para konferencës së parë të anëtarësimit dhe shtatë të tjera para se të fillojë konferenca e dytë, respektivisht hapja e kapitujve të parë ( 23 dhe 24). Dokumenti u miratua me shumicë të madhe votash. Vetëm 28 deputetë kishin qenë kundër, katër abstenuan, nga 246 deputetë që ka gjithsej grupi parlamentar më i madh në Gjermani. Grupi Parlamentar Socialdemokrat e kishte miratuar më parë të njëjtin dokument me shumicë të madhe votash. Dy kushtet e vendosura nga Bundestagu para se të fillojë konferenca e parë e anëtarësimit, e cila pritet të jetë nga pranvera e vitit te ardhshëm, janë funksionimi i Gjykatës Kushtetuese dhe Gjykatës së Lartë dhe miratimi i Reformës Zgjedhore. Gjermania ka kushtëzuar avancimin e bisedimeve me Shqipërinë me funksionimin e Gjykatës së Lartë dhe asaj Kushtetuese dhe miratimin e Reformës Zgjedhore.