Taulant Balla paralajmëron ashpërsimin e ligjit

"Ndëshkime për Fake News dhe ndërhyrjet nga jashtë në fushatë"

Kryetari i grupit parlamentar të Partisë Socialiste, Taulant Balla, ka paralajmëruar një nismë të re ligjore, sa i përket ndërhyrjeve të forcave të huaja në zgjedhje dhe lajmet e rreme. Iniciativën, numri dy i PS- së, e ka bërë përmes një postimi në rrjetet sociale, ku thekson se shembullin e merr nga Parlamenti Europian. Duke iu referuar dokumentit, "mbi ndërhyrjet e huaja elektorale dhe dezinformimin në proceset demokratike kombëtare dhe Europiane", Balla thotë se ka ardhur koha që një nismë e tillë të ndërmerret dhe të kalohet në Parlament në Shqipëri, sa më shpejt. Paketën antishpifje, që ende nuk ka kaluar në Kuvend, Balla e cilëson vetëm si hapin e parë në këtë drejtim, duke thënë se vendi ynë e ka tashmë një shembull të ndërhyrjeve nga jashtë në një proces zgjedhor. "Bashkimi Europian po ndërmerr veprime kundër ndërhyrjes së huaj në fushatat elektorale dhe kundër lajmeve të rreme. Duhet që edhe në Kuvendin e Shqipërisë të mos vonojmë marrjen e masave të njëjta, sikurse edhe nga BE- ja. Në ditët në vijim, do të prezantojmë në Kuvendin e Shqipërisë një Rezolutë të përafruar me dokumentin që Parlamenti Europian miratoi këtë javë. Rezoluta e PE, e miratuar të enjten më 10 tetor 2019, ishte një dokument tepër i fortë ' mbi ndërhyrjet e huaja elektorale dhe dezinformimin në proceset demokratike kombëtare dhe Europiane'. Paketa antishpifje e miratuar nga Qeveria shqiptare dhe që pret miratimin në Kuvend, është një hap i parë, i rëndësishëm për ta mbrojtur Shqipërinë nga dezinformimi. Qëllimi është i mirë: çdokush të marrë përgjegjësinë për fabrikimin apo shpërndarjen e lajmit të rremë. Duhet ta përmbyllim këtë fazë të parë të betejës me dezinformimin. Zgjidhja e ofruar në Paketën antishpifje është e njëjtë me çfarë sugjeron BE- ja, ' një përmirësim të Task- Forcës të BE- së StratCom në një strukturë të përhershme me një financim dukshëm më të mirë'. Në fakt, edhe Shqipëria regjistron një rast të rëndë të ndërhyrjes së huaj elektorale përmes financimit me burime nga kompani guaska, prapa të cilave ka prova se fshihet Rusia. Megjithëse vendet anëtare të BE- së ndalojnë plotësisht ose pjesërisht dhurimet e huaja për partitë politike ose kandidatët... Dezinformimi përmes publikimit të lajmeve të rreme është gjithashtu një problem akut në Shqipëri, masat për shërimin sado pak të të cilit duhet të jenë urgjente", shkruan Balla ndër të tjera në postimin e tij në "Facebook".