Raundi i fundit në universitete, kuotat e lira dhe degët që mbyllen
Profilet ku gara do të jetë më e ashpër dhe ato që rrezikojnë të mos hapen. Kategoritë e aplikantëve për këtë raund regjistrimesh
Këto janë kuotat për të cilat do të garohet në raundin e tretë dhe të fundit të regjistrimeve në universitete.
Ata që ende nuk e kanë bërë zgjedhjen e tyre, kanë afat edhe sot të aplikojnë me Formularin A4, pasi të kenë parë mundësitë e pranimit të ballafaquara me potencialin e pikëve që kanë. Fituesit do të shpallen më 19 tetor, pesë ditë pasi të ketë filluar viti i ri akademik 2019- 2020. Regjistrimet do të bëhen me tri faza kësaj here, nga data 21- 26 tetor.
VENDET BOSH Janë një listë profilesh të ezauruara plotësisht në dy raundet e para, ashtu si edhe një tjetër që pret deri në fund të garës plotësimin e numrit minimal prej dhjetë studentësh, për të funksionuar si degë. Të parat, nuk do shumë mund për t'i identifikuar. Mjekësi e Përgjithshme, Teknologji Informacioni, Financë, informatikë, Farmaci, Stomatologji, Mami, Infermieri, Inxhinieri telekomunikacioni, ajo Elektronike, Ndërtimi e Arkitektura me dy profilet e saj e shumë të tjera si këto, kanë hapësirë shumë të vogël pranimi ( nga zero maksimumi deri në pesë) për studentë të rinj, bazuar në kapacitetet pritëse që kanë shprehur në krye të herës. Ndaj, këto pak kuota do të jenë edhe beteja për ata pak nxënës shumë të mirë që deri më tani nuk e kanë fituar ende atë që duan. Pjesa tjetër, do të endet midis meritës dhe preferencave të tyre, për të gjetur veten në ndonjërën prej kuotave të lira. Këshillohet që përpara se të përzgjedhin, të shqyrtojnë listën e mëposhtme për të vendosur si duhet. Më fatlumë do të jenë ata që synojnë Artet e Sportet. Pas vendimit të qeverisë, javën e shkuar, ata nuk do ta kenë kusht përmbushjen e kriterit të notës mesatare 6.5 për të aplikuar. Sidoqoftë, Universiteti i Sporteve e ka përmbushur misionin për këtë vit, duke mbyllur me sukses regjistrimet në dy degët Bachelor, ndërsa në Universitetin e Arteve kanë mbetur ende disa hapësira për pranime. IAL- të në rrethe mbeten në pritje të studentëve të rinj. Disa profile, syresh, presin edhe të vendoset fati i tyre, nëse do të hapen ose jo këtë vit për studentët. Tri degë në Fakultetin e Gjuhëve të Huaja, Greqishtja ( 4 regjistrime), Rusishtja ( 0 regjistrime) dhe Turqishtja ( 8 studentë të regjistruar) kanë pak ose aspak shpresë. Në Universitetin e Durrësit, Historia, Menaxhimi Turizëm arkeologjik, Informatikë ( anglisht) dhe Filozofi- Sociologji janë profilet që rrezikojnë, në rast se regjistrimet ngelin në vend numëro. "Fan Noli" i Korçës duket se do të ketë më pak degë nga ky vit. Matematika, Informatika, Biologji- Kimia, Filozofi- Sociologjia, Gjuhë dhe kulturë frënge, Agroushqimi, Gjuhë- letërsia, Biznes e Tregtia, Inxhinieri agronomike, Mnaxhim agrobiznesi, Mësuesia për arsimin fillor rrezikojnë të mos hapen, pasi nuk kanë as dhjetë studentë deri më tani. I njëjti trend shkurtimesh do të prekë pa përjashtim të gjitha universitetet e rretheve, kryesisht degët e mësuesisë, për të cilat jo pak të rinj nuk kanë aplikuar dot pas kriterit të ri të mesatares 7.5 për profilet e edukimit.