Nga Parlamenti me dy Dhoma te referendumet, 10 tezat e Grida Dumës në “Koha për Politikë”
Duma: Liria është mundësi, kjo mundësi të vijë nëpërmjet listave të hapura dhe jo paraemërimi i kandidatëve me lista të mbyllura
Në kulmin e krizës politike në vend, ish- deputetja dhe njëkohësisht anëtarja e kryesisë së Partisë Demokratike, Grida Duma, promovoi dje librin e saj “Koha për Politikë”, ku bën disa propozime të forta në ndryshimin e arenës politike.
Në librin e saj, Duma thotë se është i domosdoshëm një reformim kushtetues, ku të krijohet një Parlament me dy dhoma, në mënyrë që të shfrytëzohet ekspertiza dhe eksperienca e ish- presidentëve, ish- kryetarëve të Kuvendit, intelektualëve dhe ekspertëve. Po ashtu, ajo ripërsëriti tezën e listave të hapura, pasi vetëm në këtë mënyrë, qytetarëve u jepet liri për të zgjedhur atë që ata mendojnë se përfaqësojnë interesat e tyre. “Unë i rikthehem tezave, por me një ripërmbledhje se çfarë do të thotë nëse ato do të trajtoheshin dhe implementoheshin nga pikëpamja e djathtë. Në ato dhjetë teza të bashkëmbledhura tashmë, unë kam folur pa diskutim për një sistem të ri kushtetues, i domosdoshëm. Nuk kemi më luksin të humbim eksperiencat. Nuk mundet që Parlamenti jonë të mos përfaqësojë më eksperiencën dhe ekspertizën. Ish- president, ish- kryetar Kuvendi, ishProkuror i Përgjithshëm, akademik, ekspertë të nderuar duhet të marrin pjesë dhe duhet të jenë “check and balance” i atij Parlamenti, të cilët nuk mund të gjykojnë mirë vetëm me votën e të zgjedhurve. Duhet gjykuar mirë edhe nga perspektiva e eksperiencës. Si e kemi ne luksin që të humbim këtë eksperiencë?! Nuk e kemi! Nuk e di të ketë një biznes, i cili të thotë nuk ka njerëz, nuk ka njerëz të aftë. Dhe ne në majën e sistemit të kemi luksin të humbim këtë ekspertizë?! Jo, nuk e kemi. Na duhet një Parlament dydhomash”, tha Duma. Në librin “Koha për politikë” ku përmbledh 10 teza të djathta, ish- deputetja e PD- së propozon, gjithashtu lista të hapura. “Dhe pa dyshim sistemi i hapur i kandidimit të deputetëve. Ne themi mbrojtja e votës së lirë. Ky është vetëm fundi i zinxhirit. Por nga ana tjetër, a duhet të sigurojmë ne që njerëzit, qytetarët, të zgjedhin se kush do të kandidojnë? Liria është mundësi, nuk është numërim, dhe në këtë kuptim, duhet të vijë nëpërmjet listave të hapura se kush do të jenë kandidatët dhe jo para emërimi i tyre me lista të mbyllura. Nuk jam duke thënë gjëra që nuk i kam thënë ndonjëherë. Por padyshim, ai që i shkruan ato dhe vendos emrin, merr përgjegjësinë për t’i shtyrë përpara këto ide”, tha Duma. Si një reflektim nga kërkesat e komunitetit të artistëve, anëtarja e kryesisë së PD- së propozon edhe dhënien e mundësisë reale për të bërë referendume. “Na duhet një demokraci e drejtpërdrejtë e shpejtë që kthen besimin. Pra, referendumet, sepse kjo i jep mundësi njerëzve që pa qenë askund, në asnjë institucion, të ngrenë çështje që i shqetësojnë. Sepse e kanë një institucion, referendumin, gjë që e kam dëgjuar mes artistëve të cilët na e thanë, ‘ na bindni, duke e bërë ligj që ta besojmë që ju jeni vërtet me ne’”, vijoi Duma.
KONCESIONET Në librin e saj të prezantuar ditën e djeshme, ish- deputetja flet edhe për koncesionet, PPP dhe politikat në sipërfaqe sipas saj të djathta të qeverisë së majtë. Sipas Dumës, politikat e djathta të djegura nga kjo qeveri që nga 2013, kanë dështuar. Por ishdeputetja thotë në librin e saj se këto skema nuk kanë dështuar se janë teza të djathta, por për shkak të implementimit autokratik nga qeveria. “Jam rikthyer sot me një riparje të këtyre tezave, për një arsye themelore. Një qeverisje e majtë që në sipërfaqe duket se ka tentuar të aplikoj teza të djathta, koncesione, PPP, elemente të djathta në skemën e pensioneve etj. Në fakt, kanë dështuar. Nuk është e thënë nga një forcë politike, por nga mirëqenia e shqiptarëve. Pikërisht për këtë arsye vihet re qartazi se nuk janë tezat e djathta të cilat kanë dështuar, por është aplikimi i tyre autokratik”, tha Duma. Në fund, ajo shtoi se është koha që gjithsecili të jap idetë e veta.