Meta zgjedh Besnik Muçin për në Kushtetuese, por prokurori akoma në Veting
Dje seanca dëgjimore, u kërkua deklasifikimi i një informacioni nga DSIK. Muçi: “Akuzohem” për kontrata me dy të dënuar
Në kohën kur Besnik Muçi ndodhej përballë Kolegjit të Posaçëm të Apelimit për të kaluar testin e dytë të vetingut, Presidenti Ilir Meta dekretoi emërimin e tij si gjyqtar të Gjykatës Kushtetuese.
Emërimi i tij u krye për të plotësuar një nga vakancat e Gjykatës Kushtetuese, ndërsa një nga argumentet e Metës ishte se Muçi plotëson kriterin e balancës gjinore me eksperiencën profesionale dhe se ishte i vetmi kandidat magjistrat ( prokuror) i përfshirë në tri vendet e para të listës. "Në kushtet kur zoti Besnik Muçi është i vetmi kandidat magjistrat ( Prokuror) i përfshirë në tri vendet e para të listës së kandidatëve për plotësimin e kësaj vakance dhe në kushtet kur ai është dhe kandidati i vetëm i gjinisë mashkullore, atëherë këto janë disa arsye më shumë ligjore dhe objektive për përzgjedhjen e kësaj kandidature, duke plotësuar njëkohësisht dhe kërkesat dhe frymën që dikton ligji nr. 8577/ 2000", argumentoi Presidenti Meta. Ndërkohë, dje, KPA ka kërkuar informacion në DSIK në lidhje me deklasifikimin e një materiali sekret shtetëror. Në përgjigjen që i ka kthyer Kolegjit, DSIK ka pranuar deklasifikimin. Prokurori i Krimeve të Renda, ish- kandidat për Kryeprokuror, u konfirmua në detyrë më 1 gusht 2018 nga KPK. Besnik Muçi u zgjodh nga Meta mes 4 kandidatëve të përzgjedhur nga Këshilli i Emërimeve në Drejtësi. Emrat e tjerë ishin Arta Vorpsi, Elsa Toska dhe Regleta Panajoti. Ndërsa Kolegji i Posaçëm i Apelimit e shtyu dje vendimin për Muçin, tashmë ai është dekretuar nga Presidenti Meta. Megjithatë, në rast se KPA vendos shkarkimin e tij nga detyra, "fati" i Gjykatës Kushtetuese vihet sërish në pikëpyetje.
PROKURORI
Lidhur me çështjen e deklasifikimit të një materiali sekret shtetëror, që KPA i kërkoi DSIK, Besnik Muçi i përmendi shkurtimisht të dyja rastet, duke thënë se bëhet fjalë për një apartament dhe një makinë. Ndërsa argumentoi se e kishte të vështirë të gjente fakte, duke qenë se me personat në fjalë ka pasur vetëm marrëdhënie kontraktuale. "Paraqitja për informacion të ardhur pas fazës së parë, është sensitiv dhe i prekshëm, për opinionin publik dhe pa dyshim edhe për mua. Gjatë seancave të kaluara, opinionit publik i kemi dhënë një gjysmë të vërtetë, pa i treguar përmbajtjen e informacionit të deklasifikuar tashmë nga DSIK. Por dua të sqaroj opinioni publik se kush janë personat dhe me çfarë akuzohen. I pari është administratori i kompanisë, i dënuar për moskallëzim krimi, personi që mua më ka shitur apartamentin. Unë nuk kam fakte për situatën. Personi tjetër i lidhur është shtetas që unë i kam blerë një mjet. Ai është proceduar dy herë nga Prokuroria. Është dërguar në gjyq për drejtim në gjendje të dehur të mjetit dhe kundërshtim të punonjësit të Policisë. E kisha të vështirë ta gjeja veten në këto fakte të KP dhe shkakun që unë lidhem me ata persona, pasi lidhja ime me ta është vetëm kontraktuale dhe asgjë më tepër. Unë akuzohem se kam lidhje me dy persona të dënuar. Opinioni publik është helmuar me këtë informacion gjysmë të vërtetë përgjatë kësaj kohe, deri në momentin kur u deklasifikua dokumenti. Këmbëngulja e KP për ta përdorur si provë nuk ka asnjë vlerë për procesin në fjalë. Në kushtet kur nuk ka shkak ligjor për t'u pranuar gjatë procesit, vlerësoj që nuk jemi në rrethane për marrjen e kësaj prove", u shpreh prokurori Besnik Muçi.
PERZGJEDHJA
Besnik Muçi, i cili ka mbaruar studimet në vitin 1995 dhe ka punuar për 20 vjet si prokuror, arriti të kalojë shkallën e parë të vetingut në vitin 2018 me një "vlerësim minimal në aftësi profesionale", ndërsa vendimi i konfirmimit në detyrë është apeluar dhe po shqyrtohet aktualisht nga Kolegji i Pavarur i Apelimit, për pamjaftueshmëri në kriterin e pasurisë. Këshilli i Emërimeve në Drejtësi e përzgjodhi emrin e tij nga një listë me 22 kandidatë dhe i paraqiti zyrës së Presidentit katër emra, ku Arta Vorpsi u rendit me pikët më të larta dhe Besnik Muçi u rendit i treti. Vetëm pak orë nga dekretimi për ta çuar drejt Gjykatës Kushtetuese, prokurorit të Krimeve të Rënda iu desh të përballej me Kolegjin e Posaçëm të Apelimit, pasi nota kaluese që mori në shkallën e parë të vetingut u apelua nga Komisioneri Publik. KPA deklasifikoi një dokument sekret të DSIK, ku thuhej se prokurori Besnik Muci ka dy kontakte të papërshtatshme. Sipas KP, subjekti rivlerësimit Benik Muçi mund të vihet lehtësisht nën presionin e strukturave kriminale. KPA vendosi t'i kërkojë Prokurorisë së Krimeve të Rënda informacion nëse prokurori Besnik Muçi kishte informacion apo trajtuar proceduralisht 4 persona, dy prej të cilët të vlerësuar nga DSIK si të papërshtatshëm.