Kërkoi arrestimin e Tahirit, konfirmohet në detyrë Hajdarmataj
Komisioni i Pavarur i Kualifikimit konfirmoi dje në detyrë Besim Hajdarmataj, prokurorin që kërkoi arrestimin e ish- ministrit të Brendshëm, Saimir Tahuri. Megjithatë, KPA e referoi në ILD për nisjen e një procesi disiplinor. KPK vendosi transferimin e dosjes që i përket çështje penale nr. 129 të vitit 2010 pranë organit kompetent ( ILD) për inspektimin e shkaqeve që mund të përbëjnë shkelje disiplinore. Dosja bën fjalë për kohën kur Hajdarmataj ka qenë drejtues Prokurorie në Kurbin në vitin 2010. Në seancën e kaluar, përfaqësuesi i ONM i kërkoi një shpjegim Besim Hajdarmatajt pse u transferua dosja e 12 tonëve kanabis, sekuestruar në Përmet në vitin 2017, te Prokuroria e Përmetit. Por Hajdarmataj tha se ai ka respektuar pavarësinë e prokurorit të çështjes pasi kështu e detyron ligji, ndërsa mbi 25 denoncimet e bëra për të, KPK tha se nuk kishin prova që faktonin shkeljen e ligjit. Për hetimin e pasurisë, KPK zbuloi edhe një dhuratë në 6 mijë euro dhe 4 mijë paund nga vëllai i prokurorit që jetonte në Angli. Hajdarmataj, me një karrierë 20- vjeçare në sistemin e drejtësisë dhe që u bë i njohur në vitin 2017 si një nga prokurorët e Krimeve të Rënda që kërkoi arrestimin e ish- ministrit të Brendshëm Saimir Tahiri, u konfirmua në detyrë nga Komisioni i Pavarur i Kualifikimit të mërkurën, më 16 tetor, pasi Komisioni nuk gjeti probleme në asnjë nga tri kriteret e vlerësimit. Megjithatë, komisioni i përbërë nga Brunilda Bekteshi, me relatore Suela Zhegu dhe anëtar Roland Ilia, vendosi që bashkë me konfirmimin në detyrë të referojë Hajdarmatajn për një hetim disiplinor për të parë nëse ka pasur shkelje në një dosje të hetuar prej tij shumë vite më parë. Hajdarmataj e ka filluar karrierën në sistemin e drejtësisë në vitin 1999 dhe përgjatë 20 viteve, ai ka mbajtur poste drejtuese në Prokurorinë e Tropojës, të Kurbinit dhe Durrësit. Në maj 2015, ai u emërua prokuror në Prokurorinë e Krimeve të Rënda dhe një vit më vonë mori drejtimin e kësaj Prokurorie.