RENEA arreston “të fortin” e Vlorës në Selenicë, si iu shpëtoi 5 operacioneve

Mbante pistoletë me fishek në fole, tentoi të çante rrethimin, por u neutralizua. Kush është "Tesi", i dënuar në Itali për 4 vrasje

Pas 5 operacioneve të dështuara të Forcave Speciale, RENEA arriti të "mbërthente" dje në Selenicë të Vlorës një të shumëkërkuar, të dënuar me burgim të përjetshëm në Itali, që ishte arratisur nga burgu.

Ai është Tesilvan Basho, i njohur si "Tesi", që vitet e fundit, falë edhe informatorëve që kishte në Policinë lokale, kishte kthyer duarbosh forcat RENEA, që ishin nisur disa herë për ta arrestuar. Në operacionin e fundit, atë të para dy viteve, forcat speciale i ishin afruar shumë vendit ku ai fshihej, por në çastet e fundit ai arriti të largohej. Gjithmonë pati informacione se persona brenda radhëve të Policisë e informonin për të gjitha operacionet, por asnjëherë nuk u provua dot asgjë. Ndërsa dje gjithçka u koordinua mirë nga RENEA. Basho u rrethua në befasi teksa ndodhej në një lokal në Selenicë, por kësaj here tentativa e tij për t'u shpëtuar prangave dështoi. Edhe pse bëri të nxirrte nga brezi pistoletën, që e kishte me fishek në fole, kundërshtimi ndaj forcave speciale mbeti vetëm në atë fazë, pasi efektivët e shtrinë menjëherë në tokë. Më pas nuk pati më asnjë reagim nga ana e 38- vjeçarit. I rrezikshmi i Vlorës u çarmatos me shpejtësi dhe iu vunë prangat. Pasditen e djeshme, ai u transferua në Policinë e Tiranës nën masa të rrepta sigurie. Ndërsa në kthim, në vazhdim të operacionit të koordinuar deri në detaje, u prangos edhe vëllai i tij, Satilno Basho, 33 vjeç, i dyshuar për gjobëvënie.

OPERACIONI Zv. drejtoresha e Përgjithshme e Policisë, Aida Hajnaj, e shoqëruar nga drejtori i Policisë Kriminale, Tonin Vocaj, dhe ai i Rendit e Sigurisë Publike, Gjovalin Loka, doli në një konferencë për shtyp duke dhënë detaje për operacionin e koduar "Selenica". Hajnaj u shpreh se operacioni ishte kryer nga Departamenti i Policisë Kriminale, në bashkëpunim me Drejtorinë e Forcës së Posaçme Operacionale në Policinë e Shtetit, Forcat Speciale RENEA, Drejtoria Vendore e Policisë Vlorë dhe Prokurorinë e Krimeve të Rënda. "Kapet një person me rrezikshmëri shumë të lartë shoqërore, i dënuar në Itali me burgim të përjetshëm për vrasje, si dhe me precedentë të theksuar kriminalë në Shqipëri, në fushën e krimeve kundër personit dhe në fushën e narkotikëve. Gjatë operacionit kapet dhe vëllai i tij për ' Shtrëngim me dhunë për dhënie pasurie'. Sekuestrohen arsenal armësh, municione, tritol e lëndë narkotike", tha dje Hajnaj.

I KERKUARI Departamenti i Policisë Kriminale, pas informacioneve të grumbulluara, në bashkëpunim me Drejtorinë e Forcës së Posaçme Operacionale në Policinë e Shtetit, Forcat Speciale RENEA, Drejtorinë Vendore të Policisë Vlorë dhe Prokurorinë e Krimeve të Rënda Tiranë, në kuadër të operacionit "Selenica", si rezultat i ndërhyrjes profesionale, ka bërë të mundur kapjen dhe arrestimin në flagrancë të personit me rrezikshmëri shumë të lartë shoqërore, Tesi alias Tesilvan Basho, 38 vjeç, banues në Selenicë, Vlorë. Ky shtetas në momentin e ndërhyrjes së Policisë ka tentuar të reagojë dhe të largohet, por falë veprimeve profesionale të Policisë është neutralizuar dhe vënë në pranga. Gjykata e Torinos, Itali, në vitin 2016 e ka dënuar me burgim të përjetshëm, për veprat penale "Vrasje", "Shfrytëzim prostitucioni" dhe "Mbajtja dhe transportimi pa leje i armëve të zjarrit". Më datë 24.01.2008, ky shtetas ka vrarë me armë zjarri dy shtetase që ushtronin prostitucion në qytetin e Torinos, Itali, njërën prej të cilave e shfrytëzonte ky shtetas për prostitucion. Shtetasi Tesi Basho në 2016 është arratisur nga burgu i Rebibos në Itali. Gjithashtu, u ekzekutua vendimi i Gjykatës së Rrethit Vlorë, i vitit 2019, e cila ka vendosur masën e sigurisë "Arrest në burg" për shtetasin Tesi ( Tesilvan) Basho, për veprat penale "Armëmbajtja pa leje", "Prodhimi dhe shitja e narkotikëve" dhe "Kultivimi i bimëve narkotike".