Ministrja Gjonaj transferon drejtuesit e Burgjeve
Pas largimit të Gëzim Selimit, ndryshojnë edhe 7 drejtorë
Pas largimit nga detyra të drejtorit të Burgut të Reçit, Gëzim Selimi, ka pasur të tjera lëvizje në disa burgje të vendit. Ministrja e Drejtësisë, Etilda Gjonaj, ka firmosur emërimin në krye të IEVP- së te "Mine Peza", i njohur si Burgu 302, Aurel Jazxhi, ndërsa në krye të IEVP- së te rruga "Jordan Misja", apo i njohur si Burgu 313, është emëruar Eduard Strugaj. Ndërkohë, mësohet se drejtori i Burgut të Fushë- Krujës është transferuar në Durrës, ndërsa ai i Burgut 313, është transferuar në Fushë- Krujë. Gjithashtu drejtori i Burgut të Gjirokastrës dhe ai i Sarandës kanë ndërruar vendet me njëri- tjetrin. Në Burgun e Reçit, në vend të Gëzim Selimit, i cili është transferuar në Shkodër, është emëruar Dedë Zhivani, prezantimi i të cilit është bërë dy ditë më parë, kur drejtori i ri është njohur edhe me detyrat dhe përgjegjësitë në këtë institucion, për të cilin u investua edhe nga Bashkimi Europian. Një ditë më parë, në mbledhjen që u zhvillua në Komisionin e Sigurisë, drejtori i Përgjithshëm i Burgjeve, Agim Ismaili, ka pohuar se nga ambientet e vuajtjes së dënimit janë porositur vrasje prej personave me rrezikshmëri të lartë. Teksa po raportonte në lidhje me sigurinë në ambientet e burgjeve, Ismaili paralajmëroi se të gjitha rastet e konstatuara do t'i paraqiten Prokurorisë. "Ne kemi si synim masën ndëshkuese për të burgosurit me rrezikshmëri të lartë. Nga burgu janë porositur edhe vrasje, të gjitha do raportohen në Prokurori. 32 persona të rrezikshëm, aktualisht janë ndëshkuar pasi kanë thyer rregullat e burgut", tha Ismaili ndër të tjera.