Daka: Shumë komisionerë do hetohen, rezultatet priten në fund të muajit
Kryetarja e Komisionit Qendror të Zgjedhjeve, Valdete Daka, ka deklaruar se 6 tetori ishte ditë fantastike sa i përket votimit dhe administrimit të procesit, por procesi po “prishet” nga komisionerët. Daka tha se ajo që e kanë bërë disa komisionerë me tendencë për të deformuar votën është punë e pistë, sepse për shkak të punës së tyre, do të ketë rinumërim të shumë kutive të votimit. “Lufta brenda llojit për kandidatët e partive është e pistë”, ka deklaruar Daka në RTK. Ajo siguroi se kur të përfundojë procesi, do të dihet saktë se kush ka provuar të deformojë vullnetin e qytetarëve dhe do të ketë kallëzime penale për ata komisionerë që kanë bërë gjëra të tilla. “Janë shumë komisionerë që janë dënuar në të kaluarën dhe me gjasë edhe shumë të tjerë do të hetohen”, deklaroi Daka. Sipas saj, KQZ- ja nuk ka asnjë arsye për të vendosur për rinumërim total, sepse ka bazë ligjore për këtë. Sa i përket votave të ardhura nga Serbia ( ku zarfet dyshohet se kishin substanca toksike), për ligjshmërinë e tyre do të vendosin organet që po e hetojnë rastin. Daka e ka quajtur procesin e votimit të diasporës si lehtësisht të kompromentueshëm. Përfundimi i këtij procesi do të ndodhë diku në fund të këtij muaji ose në fillim të muajin nëntor. Ndërkohë, po vazhdon numërimi i votave të diasporës në Qendrën e Numërimit dhe Rezultateve. Nga rreth 35 mijë vota që janë dërguar me postë, vetëm 13 mijë e 491 janë të vlefshme. Sipas një dokumenti, më shumë vota kanë ardhur nga Gjermania ( 5,892), më pas Zvicra ( 3944), Suedia ( 516), Italia ( 486), Franca ( 421), Belgjika ( 307), nga SHBA ( 289) etj. Në këto zgjedhje, shtetas të Kosovës kanë votuar edhe nga vende si Kolumbia, Azerbajxhani, Senegali etj… Nga numërimi i deritanishëm i votave prin Vetëvendosja.