Nëna e Bledar Toçit: Kokainën e përdorte burri për dhimbje koke
Nëna e Bledar Toçit rrëfen në një intervistë për "Top Channel", prapaskenat e ngjarjes që tronditi një javë më parë Kavajën, kontrollin policor, dozat e kokainës që u gjendën në apartament dhe marrëdhënien e të birit me viktimën dhe Marsidën, që u shndërrua në protagoniste të një ngjarjeje ende me shumë pikëpyetje. Disa prej të cilave i ngre dhe vetë Fatbardha Toçi, dy djemtë e së cilës janë nën arrest. "Po të ishin në grup, në lidhje, si do të jetonim në këtë shtëpi 50 m2? Ai ka qenë në shtëpi me qira në Tiranë 10 vjet dhe erdhi këtu se nuk i dilte. Gruaja i iku në Itali me djalin se ka prindërit atje. Dhe Bledari do të ikte, por po priste të bënte dokumentacionin. Është thënë se është në atë punë prej xhaxhait të vet deputet, por Bledari është i përgatitur, me 3 fakultete. Bledari është pa shtëpi. Jeton këtu me ne. Ka punuar te Presidenti, në Gardë. Nëse do të merrej me këto që thuhet, si do të merrej në ato pozicione pune?! Në shtëpi u gjendën 7 doza të vogla që i përdor burri im si qetësues për dhimbjen e kokës. Ai i ka siguruar vetë ato diku në Laprakë. Tani vonë i ka filluar se nuk po i duronte dot dhembjet e kokës. Ka pësuar një aksident të rëndë dhe e ka jetë të dytë këtë. Dihet kush është ai që u vra. Le ta merrte Policia në dorë. Pse e la atë?! Pse e akuzojnë Bledarin, pse e vrave?! Po vetëmbrojtje është. Kushdo që ka përballë një që do ta gjuajë, si do të reagojë?! Do të mbrosh veten përballë një krimineli. Ne nuk e kemi pasur e as do ta kemi këtë traditë të vrasjes. Ishte aksidentale. Ai u mbrojt", shprehet Fatbardha Toçi, nëna e policit Bledar Toçi.