Pence: Turqia pranoi armëpushim në Siri, kurdët do të tërhiqen
Dërgimi i një delegacioni me zyrtarë të lartë amerikanë për të takuar Presidentin e Turqisë, Recep Tayyip Erdogan, në Ankara, ka rezultuar i suksesshëm dhe me pezullimin e luftës në Siri për 120 orë. Delegacioni i nivelit të lartë përfshinte zëvendëspresidentin amerikan, Mike Pence, Sekretarin amerikan të Shtetit, Mike Pompeo, dhe këshilltarin e Sigurisë Kombëtare, Robert O’Brien. Takimi nisi i akullt, me Presidentin Erdogan që shfaqi edhe fizikisht autoritet ndaj presionit amerikan me sanksione dhe mënyrës sesi i ishte drejtuar Trump gjatë një letre. Pence njoftoi pas takimit se SHBA dhe Turqia arritën një marrëveshje për të pezulluar ofensivën ushtarake turke në Siri. “Një javë pasi forcat turke kaluan në Siri, Turqia dhe Shtetet e Bashkuara të Amerikës kanë rënë dakord për një armëpushim atje. Do të jetë një pauzë në operacionet ushtarake për 120 orë, ndërsa Shtetet e Bashkuara lehtësojnë tërheqjen e YPG ( luftëtarëve kurdë) nga zonat e prekura në zonën e sigurt dhe pasi të përfundojë kjo, Turqia ka pranuar të ndërpresë ofensivën ushtarake plotësisht...”, tha ai. Pence shtoi se Presidenti Trump i ishte shumë mirënjohës për këtë rezultat Presidentit Erdogan dhe se SHBA nuk do të vendosë sanksione të tjera. REAGIMI I TRUMP Presidenti Trump e quajti armëpushimin si një rezultat të jashtëzakonshëm që shpëtoi jetë. “Në emër të Shteteve të Bashkuara dua të falënderoj Turqinë, dua të falënderoj të gjithë njerëzit që janë mbledhur së bashku dhe e kanë bërë këtë të ndodhë... Dhe gjëja tjetër që dua ta falënderoj si grup, janë kurdët, sepse ata ishin jashtëzakonisht të lumtur me këtë zgjidhje. Kjo është një zgjidhje që me të vërtetë iu shpëtoi jetën e tyre, sinqerisht”. ANGAZHIMI I SHBA Pence tha se Shtetet e Bashkuara do të vazhdojnë të përfshihen në Siri, por jo ushtarakisht. “SHBA do të vazhdojnë të angazhohen diplomatikisht, politikisht dhe natyrisht në ndihmë humanitare dhe mbështetje për të gjithë personat e prekur në këtë rajon”, tha Pence. Ai tha se SHBA nuk e mbështet aksionin e Turqisë në Siri, por ishte tërheqja e trupave amerikane që i mundësoi Turqisë inkursionin në Siri. ZYRTARËT TURQ Ministri i Jashtëm turk, Mevlud Cavusoglu, tha se marrëveshja nuk është për armëpushim, por se “do të ndalojmë operacionin në Siri për 120 orë me qëllim që terroristet të largohen, vetëm nëse përmbushen kushtet tona dhe vendoset zona e sigurisë në një hapësirë 20 milje në lindje në lumit Eufrat deri në kufirin me Irakun”.
Mbetet pa sqaruar se çfarë do të ndodhë me trupat siriane dhe ato ruse apo si do të reagojnë ata tani që janë afruar në kufirin me Turqisë, me kërkesë të kurdëve, pas tërheqjes ushtarake të SHBA nga rajoni.