Gjinushi del mbi dekretin e Presidentit, Fuga: Duhet vendim nga Kushtetuesja
Riemërimi në Akademi pas dorëheqjes nga PSD- ja, akademiku konfuz: Jam anëtar i rregullt prej ’ 89- ës… prej 15 majit
Të biesh si kryetar partie, e të zgjohesh si anëtar i rregullt akademie, apo t’i kryesh të dyja funksionet në kundërshtim me ligjin.
Edhe vetë akademiku Skënder Gjinushi bëhet konfuz, e nuk e përcakton dot qartë se cili është rasti i tij, ndërsa Kryesia e Akademisë së Shkencave në mbledhjen e saj të parë me dyer të mbyllura, bëri dje emërimin e tij zyrtar si kryetar Akademie, duke e konsideruar si të pavlefshëm Dekretin e Presidentit Ilir Meta të datës 11 korrik. Asambleja mundësoi “kurorëzimin” e akademikut, duke miratuar fillimisht Statutin e ri të ASH- së që ka hyrë në fuqi më 8 tetor, e mandej i la hapësirë dhe shpalljes së hapjeve të vendeve të reja për anëtarë të Asamblesë me titullin “Akademik” dhe “Akademik i asociuar”. I zgjedhur me ligjin e vjetër ( ligji nr. 9655, datë 11.12.2006) e i emëruar me të riun ( ligji nr. 53/ 2019), Gjinushi duket se e ka më të lehtë të flas për funksionin e Presidentit, sesa të tijin. “Sipas ligjit të vjetër, Presidenti duhet të bëjë vetëm emërim, nuk ka asnjë target tjetër”, thotë ai. Konfuz bëhet, kur i duhet të shpjegojë një nga argumentet që Meta rendit, ndërsa e konsideron procesin zgjedhor të 24majit në ASH si “problematik”: atë të kalimit nga kryetar partie, në anëtar të rregullt Akademie, pozicion i domosdoshëm për t’u bërë kryetari i këtij institucioni. “Kjo është përpjekja e dëshpëruar e Presidentit për të gjetur ndonjë lajthitje. Dorëheqja është shumë e qartë. Jam anëtar i rregullt i Akademisë prej datës që kam dhënë dorëheqjen… Prej ’ 89- ës”, thotë akademiku i pyetur nga “Panorama” për datën se kur është bërë riemërimi i tij, si anëtarë i rregullt i Akademisë, duke qenë se ligji i vjetër me të cilin u bënë zgjedhjet nuk lejonte që një funksionar i lartë politik të ishte njëherazi edhe anëtar i rregullt i ASH- së. ( Sipas ligjit nr. 9655, datë 11.12.2006, “Për Akademinë e Shkencave të Republikës së Shqipërisë”, me të cilin u mbajtën zgjedhjet, në nenin 6/ 1 të tij citohej se Statusi si akademik i rregullt përfundon kur anëtari “zgjidhet ose emërohet në funksione drejtuese në parti politike a në organe kushtetuese”.) Edhe pse ligji vjetër citon qartazi funksionet drejtuese në parti, ku vështirë se përjashtohet të qenit kryetar i një partie, siç Gjinushi ka qenë deri në datën 15 maj, kryetari i ri i Akademisë mundohet të justifikohet duke thënë se: “Ligji i ri e ka të qartë se në cilat poste duhet dhënë dorëheqja, ndërsa i pari nuk e thotë fare”.
“AKADEMIA ËSHTË UZURPUAR”, GJINUSHI PËR FUGËN: UZURPIMI BËHET KUR PAKICA I IMPONOHET SHUMICËS
Duke iu përgjigjur akademikut Artan Fuga, i cili pas mbledhjes që emëroi Gjinushin kryetar të ASH- së u shpreh se “Akademia është uzurpuar”, matematicienti u përgjigj se: “Institucion që me shumicë dërrmuese uzurpon veten nuk ka. Uzurpimi përdoret kur një pakicë i imponohet shumicës. Reforma në ASH është bërë edhe me ndihmën e politikës, të faktorëve që duhet të kontribuojnë në reformë, por edhe nën presion me pengesa politike të segmenteve të caktuara, e inspiruar nga grup mediokrish, që reformën e ngatërrojnë me antireformën”. Përpos kësaj, kryetari i sapoemëruar u shpreh se ASH- ja ka qenë nën një presion të vazhdueshëm që reforma në këtë institucion të ishte njësoj si ligji i IAL, që kërkon të hiqen tituj profesorësh dhe ribërjen e kësaj trupe. Edhe vendimin e Metës, e konsideroi si politik, duke lënë të nënkuptohet se shkaqet e vërteta të refuzimit të tij si kryetar, nuk kanë të bëjnë me shkeljet e pretenduara “Ndihem shumë mirë, se nuk u soll vullneti i politikës në ASH. Fakti që faktorë të ndryshëm, në momente të caktuara, kanë kundërshtuar, edhe pengesat që kanë krijuar, tregon qartë që reforma ishte jashtë ndikimeve politike. Ishte kundër politikave në tavolinë që kërkonin ndërhyrje në ASH. Mesa duket edhe Presidenti në një moment u bë palë me këto lloje segmentesh, e rrjedhimisht, ligji, kuvendi i dha të drejtën ASH- së, sepse ajo është një institucion autonom. Rektorët i zgjedh vet trupa e pedagogëve, kryetarin e ASH edhe kryetarin e ASH e zgjedhin vet akademikët. Edhe 43 vota akademikësh vlejnë më shumë se një firmë Presidenti”, tha më tej Gjinushi.