Betohet anëtari i ri i Kushtetueses, SPAK do ta nisë punën me hetimin e 400 dosjeve
Bashkë me Vitore Tushën, Gjykata Kushtetuese shkon në dy anëtarë
Besnik Muçi është anëtari i parë i Gjykatës Kushtetuese. Ai është betuar ditën e djeshme në institucionin e Presidencës në prani edhe të zyrtarëve të SHBA e BE- së. Nëpërmjet një njoftimi për mediat, Presidenca njoftoi se: “Në Institucionin e Presidentit të Republikës, në prani të përfaqësuesve të institucioneve të pavarura, ambasadorëve si dhe përfaqësuesve të vendeve të Bashkimit Europian dhe të Shteteve të Bashkuara të Amerikës, u zhvillua sonte ceremonia e betimit para Presidentit të Republikës Sh. T. Z Ilir Meta, të anëtarit të parë të Gjykatës Kushtetuese, Gjyqtarit z. Besnik Muçi”, lajmëroi Presidenca. Pas ekzekutimit të Himnit Kombëtar dhe leximit të dekretit, gjyqtari Muçi, duke vendosur dorën mbi Kushtetutën e Shqipërisë, bëri edhe betimin. “Betohem se gjatë kryerjes së detyrave të mia do t’i qëndroj kurdoherë besnik Kushtetutës së Republikës të Shqipërisë!” Tri ditë më parë, Presidenti Ilir Meta dekretoi Besnik Muçin, gjyqtar të Gjykatës Kushtetuese. Prokurori Muçi, ish- kandidat për Kryeprokuror, u konfirmua në detyrë më 1 gusht 2018 nga KPK, ndërsa vendimi i konfirmimit në detyrë është apeluar dhe po shqyrtohet aktualisht nga Kolegji i Pavarur i Apelimit, për pamjaftueshmëri në kriterin e pasurisë. Muçi ka shërbyer si prokuror pranë Prokurorisë për Krimet e Rënda. Ai gjithashtu ka qenë edhe ish- kandidat për anëtar në Këshillin e Lartë të Prokurorisë. Besnik Muçi ishte i renditur i treti nga Këshilli i Emërimeve në Drejtësi ndër 4 kandidatë. Para z. Muçi, sipas KED- së, ishte Arta Vorpsi me 89.642 pikë dhe Elsa Toska me 85.428 pikë, ndërkohë i treti me 81.928 pikë renditej Besnik Muçi dhe pas tij vinte Regleta Panajoti 80.285 pikë. “Presidenti i Republikës, pasi shqyrtoi praktikën dhe dokumentacionin e përcjellë nga Këshilli i Emërimeve në Drejtësi, në përfundim ka vendosur të përzgjedhë kandidatin Besnik Muçi për t’u emëruar gjyqtar në Gjykatën Kushtetuese, kryesisht mbështetur në këto arsye të cilat evidentohen dhe janë vlerësuar edhe më hollësisht nga Këshilli i Emërimeve në Drejtësi në vendimet e tij”, thuhej në dekretin e Presidentit të datës 16 tetor.