Refuzimi i negociatave, reagon SHBA: Zhgënjyese, presim vendim pozitiv para verës 2020
Shtetet e Bashkuara të Amerikës e kanë cilësuar zhgënjyes vendimin e Këshillit Europian për Shqipërinë dhe Maqedoninë e Veriut. Zëdhënësi i Departamentit amerikan të Shtetit, Morgan Ortagus, reagoi pas vendimit të Bashkimit Europian për të mos hapur negociatat për Maqedoninë e Veriut dhe Shqipërinë, duke shprehur zhgënjim për këtë vendim. "Shtetet e Bashkuara mbështesin përkushtimin e Maqedonisë së Veriut dhe Shqipërisë ndaj integrimit transatlantik dhe aspiratat e tyre për anëtarësim në Bashkimin Europian. Jemi të zhgënjyer që Këshilli Europian nuk njohu përpjekjet shumë të forta për reforma të secilit vend me anë të një vendimi për të hapur negociatat për anëtarësim në këtë kohë. Një vendim pozitiv do të kishte riafirmuar besueshmërinë e rrugës së tyre për në BE dhe do t'u ishte kundërvënë vendosmërisht aktorëve të huaj dashakeqës, të cilët kërkojnë të minojnë vlerat perëndimore dhe komunitetin euro- atlantik. Ne njohim faktin që Këshilli Europian nuk i tha ' jo' as Shqipërisë, as Maqedonisë së Veriut dhe as nuk përcaktoi kushte të reja për hapjen e negociatave për anëtarësim. Shpresojmë që Këshilli Europian do të arrijë konsensus për një vendim pozitiv për të dyja vendet përpara Samitit BE- Ballkani Perëndimor verën tjetër", thuhet në deklaratën e DASHit. Ortagus thekson se Shtetet e Bashkuara do të mbeten partner strategjik i të dyja vendeve të Ballkanit Perëndimor. "Shtetet e Bashkuara do të mbeten partner strategjik i Maqedonisë së Veriut dhe Shqipërisë, teksa vazhdojnë punën për të forcuar sundimin e ligjit, për të çuar përpara përpjekjet antikorrupsion, për të zhvilluar ekonomitë e tyre dhe për të luftuar krimin e organizuar. I nxisim të dyja vendet të mbeten të palëkundura në ndërtimin e shoqërive transparente, të bazuara në rregulla dhe demokratike që iu përgjigjen nevojave të qytetarëve. Shtetet e Bashkuara do të vazhdojnë të punojmë me partnerët europianë për të çuar përpara synimet e përbashkëta të stabilitetit dhe sigurisë në Ballkanin Perëndimor", thuhet në deklaratën e Departamentit amerikan të Shtetit.