Dorëheqja e Zaev, Shkupi: Qeveria vazhdon konsultimet
Menjëherë pas deklaratave se për Shqipërinë dhe Maqedoninë e Veriut nuk u vendos për hapjen e negociatave, mediat e huaja njoftuan për dorëheqjen nga posti i Kryeministrit të Maqedonisë së Veriut, të Zoran Zaev. Por, qeveria e Shkupit nuk e ka konfirmuar këtë lajm, duke njoftuar se Kryeministri po zhvillon konsultimet me faktorin politik në vend. “Kryetari i Qeverisë së Republikës së Maqedonisë së Veriut, Zoran Zaev, gjatë ditës së sotme po zhvillon konsultime intensive në nivele të ndryshme, duke i pasur parasysh konfuzionet e sjella nga Këshilli Europian, me të cilat anulohet marrja e vendimit për fillimin e negociatave për anëtarësimin e Maqedonisë së Veriut në Bashkimin Europian. Gjatë konsultimeve, vendimet merren ekskluzivisht në pajtim me interesat më të lartë të shtetit dhe qytetarëve. Sapo të merret çfarëdolloj vendimi, të njëjtat menjëherë do të publikohen. Gjatë ditës së sotme, Zaev vendosi kontakt edhe me njerëzit e parë të qeverive të Gjermanisë, Suedisë, Bullgarisë, Sllovenisë, Maltës dhe me liderë të tjerë evropian, përfshirë këtu edhe euro- komisarin Han. Nga të gjithë liderët evropian ka arritur porosi e qartë për mbështetje të Maqedonisë së Veriut dhe qytetarëve në vazhdimin e rrugës së reformave dhe integrimeve. Liderët evropian kanë dhënë mirënjohje dhe vërtetim për të gjithë hapat që i ka ndërmarrë Maqedonia e Veriut dhe potencon se vendi dhe qytetarët kanë qenë të përgatitur plotësisht për fillimin e bisedimeve, por që disa vende të BE- së nuk kanë qenë të gatshme për këtë gjë”, thuhet në njoftimin e qeverisë së Maqedonisë së Veriut.