Pengmarrje si në filma, shpëtohet 31- vjeçari
Një i arrestuar në flagrancë, tre të tjerë shpallen në kërkim
BURREL - Morën peng 31vjeçarin, një në pranga, tre në kërkim. Në orët e para të së premtes, qyteti i Burrelit u alarmua nga një telefonatë anonime në drejtim të Policisë, ku lajmërohej marrja peng e një të riu në lagjen “Pjetër Budi”. 31- vjeçari u mor me forcë në makinë nga disa persona me maska dhe armë rreth orës 03: 40. Denoncuesi lajmëronte Policinë se rrëmbyesit ishin nga vendi i quajtur “Kthesa e Daçit”, në drejtim të Komsisë. Pas telefonatës, efektivët u vunë në ndjekje të mjetit me të cilin lëviznin autorët. Fillimisht, Policia bllokoi hyrje- daljet e qytetit me disa efektivë, ndërkohë nisi krehja e zonës, fshatrave Gërman, Muzhakë, Midhë, Frankth, Batër e Vogël dhe Batër e Madhe. Pas kontrolleve të shumta u arrit lokalizimi i fshatit, ku autorët kishin dërguar personin e marrë peng, 31- vjeçarin A. Hoti. Me ndihmën e banorëve të fshatit është rrethuar rreth orës 05: 30 banesa ku autorët kishin dërguar pengun. Rezultoi se për dy orë, shtetasit S. L., 32 vjeç, banues në Burrel, në bashkëpunim me shtetasit L. I., 34 vjeç, M. B., 24 vjeç dhe S. L., 31 vjeç, të gjithë banues në Burrel, për shkak të një konflikti të hershëm, nën kërcënimin e armës kishin marrë me forcë në automjet 31- vjeçarin Hoti dhe më pas e kanë dërguar në një banesë në fshatin Batër e Madhe. Efektivët e Policisë hynë në banesë dhe fillimisht kanë arritur të shpëtojnë të riun e marrë peng, si dhe kanë arrestuar në kushtet e flagrancës shtetasin S. L., 32 vjeç, kurse tre të tjerët u shpallën në kërkim. Ndërkohë, një person i katërt po ndiqet në gjendje të lirë, edhe ai akuzohet për bashkëpunim me rrëmbyesit, pasi gjithçka ka ndodhur në banesën e tij. Burime pranë Komisariatit të Policisë Mat bënë me dije se gjatë kontrollit në vendin e ngjarjes është gjetur dhe sekuestruar një armë zjarri kallashnikov, model 56, me 15 fishekë dhe automjeti tip “Mercedes Benz”, i përdorur nga pengmarrësit. Nga hetimet e deritanishme, dyshohet se ngjarja ka ardhur për shkak të një sherri që personi i marrë peng ka pasur me një nga autorët dhe pengmarrja ka ardhur si formë hakmarrjeje. Një ngjarje e tillë është pritur me shqetësim nga banorët e Matit, sepse nuk ka ndodhur më parë. Autorët e kësaj ngjarjeje të rëndë akuzohen për veprat penale “Heqja e paligjshme e lirisë”, e kryer në bashkëpunim dhe “Mbajtja pa leje e armëve dhe municioneve luftarake”. a. l