U kap me mina dhe drogë, lirohet vëllai i prezantueses
U dënua me 4 vjet burg, tani do qëndrojë 5 vite në shërbim prove
U kap me mina me telekomandë dhe kanabis në makinë, rifiton lirinë pas një viti burg vëllai i moderatores Alketa Vejsiu.
Gjykata e Lezhës ka liruar nga qelia Endrit Vejsiun, pasi vuajtja e pjesës së mbetur e dënimit është pezulluar me shërbim prove. Tanimë, 30vjeçari do të mbahet në shërbim prove për një periudhë 5vjeçare. Vejsiu u arrestua më 30 shtator të vitit të kaluar, ku ndërsa po udhëtonte nga Tirana në Lezhë, në makinë kishte 4 mina me shpërthim të telekomanduar dhe një sasi prej 3 kg kanabis sativa. Gjykata e deklaroi fajtor atë për dy vepra penale. Në vendim thuhet se Vejsiu ishte shpallur fajtor për “Prodhim dhe shitje të narkotikëve”, vepër për të cilën parashikohet dënim nga 5 deri në 10 vjet burg dhe “Prodhim të armëve, armëve shpërthyese e municionit”, po ashtu me dënim nga 5 deri në 10 vjet. Gjykata i ka dhënë atij nga 5 vjet dënim për secilën prej veprave, minimumin e parashikuar. Më pas, në bashkim të dënimeve Vejsiu është dënuar me 6 vjet burg. Por duke qenë se i pandehuri i ka pranuar akuzat dhe ka kërkuar gjykim të shkurtuar, u dënua përfundimisht me 4 vite heqje lirie. Ndërkohë, pas qëndrimit për më shumë se një vit në paraburgim, ku çdo ditë llogaritet sa 1.5 ditë burg, Vejsiu ka rifituar lirinë me kusht. Endrit Vejsiu u arrestua nga Policia e Lezhës mbrëmjen e 30 shtatorit të vitit 2018, pasi në aksin rrugor Milot- Lezhë, në automjetin e tij iu gjetën të fshehura 4 mina me telekomandë dhe 3 kilogramë kanabis. Nga hetimet e Prokurorisë, Vejsiu rezulton se ka shërbyer si korrier i një personi tjetër, që kishte si synim të trafikonte katër mina nga Porti i Shëngjinit në drejtim të Italisë. Sipas dosjes hetimore, rezulton se Vejsiu i kishte marrë minat dhe lëndën narkotike në Tiranë, për t’i transportuar drejt Shëngjinit. Nga të dhënat e siguruara nga Policia Gjyqësore rezulton se porositësi ishte me profesion taksist dhe merrej me transportimin e lëndëve narkotike në sasi mbi pesë kilogramë, si dhe në transportimin nëpër rrethe të lëndëve plasëse, ku në disa raste, për transport përdorte edhe shtetas të tjerë. Duke shfrytëzuar lidhjet shoqërore që ky shtetas ka në rrethin e Lezhës, me të cilët bashkëpunon në ushtrimin e aktivitetit të tij kriminal, ky shtetas ka kërkuar blerës për të shitur lëndën narkotike dhe një sasi lënde plasëse, të cilën do ta trafikonte nëpërmjet Portit të Shëngjinit drejt shtetit italian. Pikërisht për të kryer transportin, ka rënë dakord që këtë ta kryejë Endrit Vejsiu. Në vijimësi të informacioneve operative të administruara nga shërbimet e Policisë, është mësuar se ky shtetas do të sillte në Lezhë një sasi prej 3 kg lëndë narkotike dhe 4 mina me telekomandë. Minat ishin paketuar me nga dy cilindra materiali të ngurtë të mbështjellë me natriban, ndërsa rreth 3 kilogramë lëndë e dyshuar narkotike kanabis sativa ishte e paketuar gati për shitje. Policia dhe Prokuroria e kishin vënë në survejim personin në fjalë, duke sjellë më pas dhe ndalimin e Endrit Vejsiut. Minat dhe lënda narkotike dyshohet se do të trafikoheshin nga Shqipëria për në Itali përmes anijeve të mallrave, që do të niseshin nga Porti i Shëngjinit në drejtim të vendit fqinj.