Hajdari: Qeveria të reflektojë, plan veprimi mbi kushtet e BE
Pas përgjigjes negative të Bashkimit Europian për të hapur negociatat me Shqipërinë dhe Maqedoninë e Veriut, kryetarja e Grupit Demokrat, Rudina Hajdari, i kërkoi qeverisë që të reflektojë mbi kushtet e vendosura nga BE- ja, Bundestagu dhe Franca. Në një postim në "Facebook" pak orë pas përgjigjes negative, Hajdari i bëri thirrje qeverisë dhe Kuvendit që të marrë dokumentin e Bundestagut në dorë dhe të hartojë një plan masash për t'i adresuar. "Çdo fjali e këtij dokumenti është një udhëzues i mirë për politikat e ardhshme, prandaj i kërkoj qeverisë shqiptare të angazhohet që të hartojë një plan të detajuar masash, për të gjitha pikat e këtij dokumenti, duke përfshirë shqetësimet e secilës prej vendeve anëtare, që kanë qenë kundër hapjes se negociatave të Bashkimit Europian me Shqipërinë. Të gjitha këto masa që do merren duhet të konsultohen sa më shpejt me institucionet kushtetuese dhe të monitorohen hap pas hapi. Ky plan veprimi duhet të ketë koston buxhetore reale për mbështetjen e këtij procesi. Plani duhet të përmbajë hapa konkretë dhe proaktivë, sikurse edhe e rekomandojnë të gjitha dokumentet e organeve të Bashkimit Europian për Shqipërinë", shkroi Hajdari. Deputetja shton se angazhimi i qeverisë dhe Parlamentit për ketë duhet të jetë serioz dhe jo deklarativ. "Prandaj, angazhimi duhet jetë serioz dhe jo deklarativ. Duhet të ulemi në tryezë të flasim për çdo pikë, pa dallime politike, apo të çdo lloj përkatësie tjetër",, shkroi Hajdari. Ndryshe nga opozita jashtëparlamentare që kërkon dorëheqjen e Kryeministrit Rama, Hajdari thotë se ajo është diçka morale. "Sot Zoran Zaev njoftoi dorëheqjen nga posti i Kryeministrit të Maqedonisë së Veriut. Kjo është çështje morali politik dhe përgjegjësie e lartë institucionale", shkroi Hajdari.