Kontrolli i kufirit të gjelbër, Lleshaj: Ndalim emigracionin
GJIROKASTER - Gjatë një takimi me forcat e Frontex në Kakavijë, ministri i Brendshëm, Sandër LLeshaj, vlerësoi mbështetjen e këtij misioni që Bashkimi Europian ka zgjedhur ta aplikojë për herë të parë me një vend jashtë unionit, siç është Shqipëria. Nga Pika Kufitare e Kakavijës, Lleshaj deklaroi se misioni i FRONTEX në Shqipëri ka vijuar tashmë punën për emigracionin e paligjshëm ndërmjet Shqipërisë dhe Greqisë. Ai theksoi se misioni i FRONTEX është i pari i këtij lloji në vendin tonë, duke i dhënë eksperiencë të veçantë Policisë shqiptare, me përafrim të saj me standardet europiane. "Që prej majit të këtij viti, ka filluar në terren operacioni i përbashkët me FRONTEX dhe Policinë shqiptare, që synon kontrollin e kufirit të gjelbër të Shqipërisë, me synim parandalimin, pengimin dhe kontrollin e emigracionit të paligjshëm. Misioni i FRONTEX në Shqipëri është i pari që realizohet jashtë Bashkimit Europian. Është një mision shumë i rëndësishëm, e para për të penguar emigracionin e paligjshëm dhe e dyta, ne synojmë që prej këtij operacioni të përfitojmë përvojën europiane, si dhe të zgjerojmë bashkëpunimin mes Policisë sonë dhe asaj europiane", deklaroi Lleshaj. Prej 5 muajsh, kufiri shqiptar monitorohet nga forcat e FRONTEX me synim parandalimin, pengimin dhe kontrollin e migracionit të paligjshëm. Ata monitorojnë me trupa operacionalë brezin e gjelbër, së bashku me Policinë Shqiptare, si dhe bashkëveprojnë për goditjen e trafiqeve dhe duke rritur sigurinë kufitare. Prej muajit maj, i gjithë kufiri mes Shqipërisë dhe Greqisë monitorohet nga 50 oficerë të FRONTEX në një marrëveshje pa limit. FRONTEX është i vendosur në 2 pika të kalimit, në Kapshticë dhe
Kakavijë, me oficerë nga Gjermania, Çekia, Lituania, Sllovenia, Estonia, Hungaria, Finlanda etj. Muajt e fundit, ky bashkëpunim ka shënuar shtim të numrit të personave, që kalojnë kufirin jeshil në mënyrë të paligjshme. b. m