Kryemadhi: Rama, përgjegjësi kryesor që s’u hapën negociatat
Kashahi: Në raport me popullsinë, numri i azilkërk uesve, më i larti në botë
Partitë opozitare i kërkuan dje Kryeministrit Edi Rama që të japë dorëheqjen, pasi Bashkimi Europian refuzoi të hapë negociatat.
Në një deklaratë për mediat, kryetarja e LSI- së, Monika Kryemadhi, akuzoi kreun e qeverisë se prej 6 vitesh ka keqqeverisur vendin, duke bashkëpunuar me kriminelët dhe duke dhunuar të drejtën e pronës, ndaj ai është i vetmi përgjegjës për refuzimin. “BE tregoi qartë se rrënimi i themelit të demokracisë në Shqipëri, është vota e lirë dhe e ndershme, shitblerja dhe kriminalizimi i saj, ku autori i vetëm është Edi Rama, dhe kjo tashmë është reflektuar edhe në kushtet që janë bërë publike, kushte që tregojnë dhe rrugën, me të cilën do të dalë Shqipëria nga kriza për t’u bërë pjesë e Bashkimit Europian. Të gjithë shqiptarët kanë kuptuar shumë qartë se me Edi Ramën, bashkimi me BEnë është një objektiv i pamundur, një ëndërr e parealizueshme për ta. Shqipëria s’është dhe s’mund të jetë kurrë peng i tij dhe dorëheqja e tij është reflektimi më i pakët për përgjegjësinë e rëndë politike që rëndon mbi Kryeministrin”, tha Kryemadhi. Ndërsa selia blu akuzoi Kryeministrin Rama se edhe këtë herë ai vuri interesat e tij personale para interesave të vendit. Ndryshe nga Kryeministri Rama, i cili tha dje dy ditë më parë se moshapja e negociatave erdhi për shkak të problemeve të brendshme të BE- së, Sekretari për Marrëdhënie Ndërkombëtare, Arben Kashahu, tha dje se është keqqeverisja e Ramës prej 6 vitesh, që po pengon integrimin. “Faji nuk është i Europës! Pengesa kryesore për moshapjen e negociatave është Edi Rama. Ai ka 6 vjet që me keqqeverisjen e tij po bllokon ëndrrën e shqiptarëve për t’u bërë pjesë e familjes europiane. Ndaj, duhet të jetë e qartë për të gjithë, nëse Shqipëria do që të bashkohet me Bashkimin Europian, kjo do të ndodhë pa Edi Ramën. Për të mirën e vendit, Edi Rama duhet të japë dorëheqjen. Nëse ai do të vendoste interesat e shqiptarëve para interesave të tij, Rama do të ikte, do të na çlironte nga qeverisja e tij e dështuar dhe do të na linte të ecnim drejt Bashkimit Europian. Ndaj, të mos ketë asnjë dyshim se ky vendim është një dështim personal për Edi Ramën. Nuk ka të bëjë me Shqipërinë, por ka të bëjë me Edi
Ramën”, tha Kashahi.
PROBLEMATIKAT
Sekretari për Çështjet Ndërkombëtare në selinë blu, Arben Kashahu, ka evidentuar disa nga problematikat që ka Shqipëria, të cilat sipas tij kanë çuar në refuzimin e hapjes së negociatave. “Janë mijëra shqiptarë që kërkojnë azil në Francë. Nën qeverinë e
Edi Ramës, Shqipëria nuk është më e shqiptarëve, po e një grushti oligarkësh dhe kriminelësh. Në raport me popullsinë, numri i azilkërkuesve shqiptarë gjatë qeverisë së Edi Ramës është më i larti në botë. Krimi shqiptar është dhjetëfishuar në Holandë, por trafikantët e drogës në Shqipëri shndërrohen në biznesmenë të fuqishëm, që pastrojnë para dhe blejnë gjithçka, drejtësinë, qeverinë, Parlamentin”, tha Kashahi. Edhe nënkryetarja e LSI- së, Monika Kryemadhi, akuzoi Ramën se detyroi mijëra të rinj shqiptarë të braktisin vendin e tyre për shkak se Shqipëria nuk jep mundësi për ta.