“Një aktore e bukur”, nga Kadare te rrëfimi i regjisorit Prifti: Ç’më tha Shpresa në takimin e fundit në Tiranë
RREFIMET E KINEASTIT LEKA BUNGO: SI E VLERESOI KADARE AKTOREN QE U NDA NGA JETA. ÇFARE THONË MARJETA DHE RIKARD LJARJA
“Nuk është thjesht një vajzë e bukur, ajo është një aktore e bukur”. Shkrimtari Ismail Kadare, ndër spektatorët e parë të shfaqjes “Mirela”, i impresionuar nga interpretimi i protagonistes e përkufizon aktoren Shpresa Bërdëllima me këto fjalë.
Kineasti Leka Bungo, pas më shumë se 3 dekadash me hidhërimin e ndarjes së parakohshme nga jeta të koleges e mikës së tij pas një sëmundje të rëndë, rrëfen episodin e të talentuarën, Shpresën e vëmendshme në sheshxhirim duke ia kushtuar asaj meritën kryesore të suksesit të shfaqjes “Mirela”, ku ai pati përgjegjësinë e tekstit dhe regjisë. Ashtu si Bungo, edhe bashkëpunëtorë të tjerë si regjisori Vladimir Prifti, aktorët Marjeta Llarja, e Petrit Malaj, shprehen të bindur se nëse Shpresa 28 vite më parë nuk do të ishte larguar, pa dyshim që ajo do të kishte pasur një karrierë brilante. Ndër rolet e fundit, në prag të rënies së diktaturës, Shpresa interpretoi edhe te “Kush e vrau Kastijin” në ’ 88- ën, edhe pse në ato vite i caktonin role rrallë e më rrallë. Pesha e dogmave e intrigave të sistemit rëndonte padrejtësisht mbi të e bashkëshortin, duke i lënë në prapavijë. Të gjendur në një situatë të tillë, në ’ 91- shin zgjodhën emigrimin. Një rrugë e kaluar jo pa mundime, ku çiftit të ri, asokohe prindër të një vajze, iu desh të endeshin sa në një shtet në tjetrin derisa Belgjika u bë vendqëndrimi i tyre. Në rikthimet e saj në Shqipëri, miqtë e tregojnë Shpresën të malluar për vendin, njerëzit, për profesionin e saj... Pavarësisht afro 3 dekadave mungesë në teatër e kinema, publiku e kujton ende me dashamirësi, që nga roli i saj i parë te “Guna përmbi tela”, ku Ilia Tërpini e përzgjodhi mes gjimnazistëve të “Petro Ninit”, e deri te “Flutura në kabinën time”, “Vajzat me kordele të kuqe”, “Era e ngrohtë e thellësive” etj. Ndarja nga jeta në moshën 60- vjeçare e Shpresës ka prekur kolegë e miq të saj. LLarja, Bungo, Prifti e Malaj rrëfejnë kujtimet nga Shpresa në sheshxhirim dhe takimet e fundit me të...
LEKA BUNGO: HUMBJE E PAZËVENDËSUESHME, ISHTE NJË AKTORE E
VËRTETË! Kineasti Leka Bungo ka bashkëpunuar disa herë me aktoren e ndjerë Shpresa Bërdëllima në varietenë e Tiranës ku ishte regjisor, edhe pse komedinë ( më pas telekomedinë 1988) “Mirela” e konsideron si një nga pikat kulminante. Si regjisor e skenarist i kësaj pjese, Bungo rrëfen se Shpresa plotësonte të gjitha karakteristikat që ai kërkonte për protagonisten. “Ishte një aktore e ngrohtë, një aktore e vërtetë, që interpretonte në mënyrë reale. Gjykimi im, u plotësua nga pritja e spektatorëve”, tregon kineasti. Veçon te Shpresa kujdesin që ajo i kushtonte çdo detaji, çdo sugjerimi në sheshxhirim. “Ishte një aktore shumë e vëmendshme, çka është kryesisht karakteristikë e aktorëve të zotë... Fatkeqësisht, një pjesë e aktorëve, qofshin edhe me shkollë, ndodh të tregohen të paduruar, të papërqendruar në krijimtari. Ndryshe ndodh shumicën e herëve me aktorët e aftë... talenti në njëfarë mënyre i nxit të jenë edhe më punëtorë, më të përulur e të vëmendshëm, e pjesë e këtyre aktorëve, që unë i quaj aktorë të vërtetë, ishte edhe Shpresa. Bungo ia dedikon asaj meritën kryesore të suksesit që pati ‘ Mirela’. “Pritja e ngrohtë që i bënë spektatorët, më shtyu ta shkruaja edhe si skenar, e ta xhironim si telekomedi në bashkëpunim me Radio- Televizionin Shqiptar. Aleksandër Lalo kompozoi një muzikë të jashtëzakonshme, e po aq e bukur ishte edhe koreografia e baletmaestros Agron Alia. Punë të shkëlqyer bëri edhe Pali Kuke si drejtor fotografie, Jorgo Papingji me tekstet, po ashtu edhe aktorët si Agim Bajko, Marjana Kondi e Vasillaq Vangjeli, megjithatë qershia mbi tortë ishte Shpresa”, tregon ai. Bungo rrëfen, se midis të tjerëve, shfaqjen “Mirela”, ku Shpresa ishte protagoniste, e vlerësoi edhe një spektatorë i veçantë. “Kur ne bëmë provat gjenerale, kujtoj se i pranishëm bashkë me Helenën ishte edhe Kadare.
Shkrimtari foli me superlativa për shfaqjen, duke u shprehur se: ‘ Është bërë një punë shumë e mirë, ka për t’u
pëlqyer’”. Ashtu si dhe vetë Bungo, duket se edhe Kadare meritat kryesore për suksesin e shfaqjes ia vesh interpretimit të Shpresës, për të cilën thotë se: “Ajo nuk është thjesht një vajzë e bukur, është një aktore e bukur”. Kineasti tregon më tej se edhe pas bashkëpunimit në kinema, me Shpresën ruajtën raporte shumë të mira. “Kemi pasur