“Do punojmë me qeverinë e re të Greqisë për Paktin Detar”
Kryeministri: Shqipëria, shembull i respektit për pakicat
Kryeministri Rama i cilësoi marrëzi qëndrimet se minoriteti grek në Shqipëri nuk gëzon të drejtat e tij.
Në një intervistë për “Euronews”, me gazetaren Semela Tuchtidou, Rama tha se minoriteti grek gëzon të njëjtat të drejta si dhe shqiptarët. Kreu i qeverisë ndodhet në vendin fqinj për të marrë pjesë në forumin BE- Ligës Arabe. “Këto janë akuza pa kuptim. Shqipëria përbën një shembull të shndritshëm për respektimin e minoriteteve dhe atij grek që jeton prej shumë kohësh në të njëjtat kushte me shqiptarët dhe kur ka probleme, ato janë të njëjtat për të gjithë. Ajo që ne po përpiqemi të bëjmë është që të rregullojmë bazën ligjore për të mirën e të gjithëve dhe të luftojmë një sistem korruptiv, i cili po thith gjakun e njerëzve përsa i përket çështjes së pronave të tyre”, tha Kryeministri, i cili shtoi se problematikat që kalon minoriteti grek janë të njëjtat që kalojnë dhe shqiptarët e Shqipërisë. “Pra, nuk ka të bëjë në mënyrë ekskluzive me minoritetin grek, por me të gjithë. Rama ka shpjeguar se ligji për shpronësimet nuk synon minoritetin grek dhe as që t’u rrëmbejë atyre pronat. Historia e marrëdhënieve mes dy popujve ka treguar se po nuk ndërhyri politika apo axhendat e ndryshme politike, është një e përbashkët. Kështu që, nuk ka përçarje apo urrejtje në zemrat e dy komuniteteve ku shqiptarët e grekët jetojnë së bashku prej shumë kohësh, ato përbëjnë një shembull të përkryer se si politika duhet të menaxhojë faktin se ne jemi fqinjë dhe në njëfarë mënyre të mallkuar të jetojmë së bashku dhe të duam njëri- tjetrin”, tha Rama. I pyetur për deklaratat e tij për vrasjen e Konstandinos Kacifas nga Policia shqiptare, Rama u përgjigj: “Kam besuar më parë dhe besoj se një person që vrapon me një armë në dorë dhe kërcënon jetën e njerëzve, është i rrezikshëm”. Për sa u përket diskutimeve për kufijtë detarë mes Shqipërisë e Greqisë, Kryeministri Rama ka nënvizuar se midis dy shteteve janë hedhur shumë hapa para. Ai është shprehur se shpreson që pas rezultateve të arritura me qeverinë e kaluar, bisedimet të vazhdojnë edhe me qeverinë e re greke, për t’u gjetur një zgjidhje e pranueshme nga të dyja palët. Ndërsa përmes një postimi në “Facebook”, ku ka shpërndarë pamjet e takimit me homologun grek, Rama shkruan se Shqipëria dhe Greqia do të intensifikojnë dialogun dhe rrisin bashkëpunimin.