Si do të zgjidhen tre anëtarët e radhës së Gjykatës Kushtetuese

Arta Vorpsi, Elsa Toska dhe Fiona Papajorgji janë praktikisht tre anëtaret e ardhshme të Gjykatës Kushtetuese, pasi janë të njëjtat që kandidojnë në thirrjen e Presidencës dhe në thirrjen e Parlamentit. Pasi Presidenti Ilir Meta zgjodhi Besnik Muçin për vakancën e parë për Gjykatën Kushtetuese, deri më datë 8 nëntor, kreu i shtetit duhet të shprehet për kandidatin e dytë që emërohet prej tij. Kreu i shtetit duhet të zgjedhë mes Arta Vorpsit, Fiona Papajorgjit dhe Elsa Toskës. Në rast se Presidenti nuk vendos të zgjedhë ndonjë prej tyre me arsyetimin se duhet të zgjedhë edhe Parlamenti emrin e parë që emërohet prej tij, pastaj kreu i shtetit të zgjedh të dytin, atëherë emërohet automatikisht kandidati që ka marrë më shumë pikë nga Këshilli i Emërimeve në Drejtësi. Ndërkohë, Parlamenti do të shfrytëzojë të gjithë afatin kohor për të zgjedhur dy anëtarët e Gjykatës Kushtetuese. Parlamenti ka kohë deri me 14 nëntor që të zgjedhë 2 anëtarët e Kushtetueses për 2 vakancat. Në rast se Presidenti shprehet deri më 8 nëntor, por edhe nëse nuk shprehet, Kuvendit i mbesin vetëm dy kandidatë për dy vende vakante në Gjykatën Kushtetuese. Bashkë me tri kandidatet që zhvilluan dje seancën dëgjimore në Komisionin e Ligjeve dhe që praktikisht do të jenë të tria gjyqtare të Gjykatës Kushtetuese, numri i gjyqtareve në këtë Gjykatë shkon në 5, bashkë me Besnik Muçin që u dekretua dhe Vitore Tushën. Por që Kushtetuesja të jetë funksionale për të marrë vendime, duhen të paktën 6 anëtarë nga 9 që duhet të jenë për të qenë e plotë.