Kontrolle me dron e qen antidroge, 7 të shoqëruar
Dogana e Tiranës "blindohet" nga 200 policë, gjejnë një pistoletë
Policia e Shtetit e ka vijuar në Tiranë zbatimin e planit të masave për kontrollin e të gjitha pikave të kalimit kufitar, porteve e aeroportit, doganave dhe çdo objekti të rëndësisë së veçantë, për parandalimin dhe goditjen e veprimtarisë kriminale dhe të paligjshmërisë në tërësi, me qëllim rritjen e parametrave të sigurisë publike. Në vijim të kontrollit të zhvilluar disa ditë më parë në Portin e Durrësit, mesditën e djeshme është përqendruar në Doganën e Tiranës, me qëllim kontrollin e personave që hyjnë dhe dalin aty, kontrollin e mjeteve dhe mallrave, si dhe të ambienteve e lokaleve përreth Doganës. Në operacion u përfshinë 200 forca Policie nga Forcat Lëvizëse Operacionale, Drejtoria e Policisë së Tiranës dhe Drejtoria e Forcës së Posaçme Operacionale në Policinë e Shtetit. Për kontrollin e territorit, krahas punonjësve të Policisë, u përdorën drone dhe qen antidroge. Policia tha dje se u kontrolluan 67 kamionë, 23 magazina dhe objekte të ndryshme brenda Doganës, 107 automjete dhe rreth 267 persona.
Gjatë kontrolleve, u sekuestruan në cilësinë e provës materiale një pistoletë, e cila do të dërgohet për ekspertim, disa vula të dyshuara si të falsifikuara e sende të tjera të kundërligjshme. Policia ka shoqëruar për veprime të mëtejshme 7 persona. "Policia e Shtetit do vijojë kontrollet në të gjitha objektet e rëndësisë së veçantë, me qëllim parandalimin dhe goditjen e veprimtarisë së kundërligjshme, si dhe rritjen e parametrave të sigurisë publike. Policia e Shtetit fton qytetarët që të denoncojnë çdo rast paligjshmërie në Komisariatin Dixhital apo në numrin 112, duke u garantuar anonimat të plotë, reagim të shpejtë e të paanshëm", tha dje Policia. Plani i masave për kontrollin e të gjitha pikave të kalimit kufitar, porteve e aeroportit dhe çdo objekti të rëndësisë së veçantë, nisi ditën e premte në Durrës. Në zbatim të këtij plani masash, në Portin e Durrësit u zhvillua operacioni "Porti i Pastër". Policia tha se operacioni synonte kontrollin e personave në hyrje e dalje, kontrollin e mjeteve, mallrave, të peshkarexheve apo mjeteve të tjera lundruese që përdoren në Portin e Durrësit, si dhe në disiplinimin e qarkullimit të automjeteve. Gjatë kontrolleve, u sekuestruan në cilësinë e provës materiale një pistoletë zhurmuese, thikë, vula të falsifikuara, targa mjetesh të falsifikuara, dokumente të kundërligjshme, si dhe sasi me cigare kontrabandë.