Daka takon Thaçin për certifikimin e zgjedhjeve, pritet ankesa e VV
Kryetarja e Komisionit Qendror të Zgjedhjeve, Valdete Daka, ka shkuar të martën në Presidencë për të takuar Presidentin e Kosovës, Hashim Thaçi, lidhur me certifikimin e rezultateve të zgjedhjeve të jashtëzakonshme parlamentare të 6 tetorit. Dy forcat më të mëdha politike pas zgjedhjeve të 6 tetorit, Vetëvendosje dhe LDK, presin certifikimin e rezultatit për të dhënë detaje të koalicionit mes tyre. Presidenca njoftoi se Daka e ka njoftuar Thaçin për hapat për përmbylljen e procesit të numërimit të votave dhe certifikimin e rezultateve të zgjedhjeve të përgjithshme. “Presidenti Thaçi e ka vlerësuar kryetaren Daka për punën, integritetin dhe profesionalizmin e KQZ- së në menaxhimin e procesit të përgjithshëm elektoral”, thuhet në komunikatë. Përmbyllja e procesit të zgjedhjeve të jashtëzakonshme, që ndodh me shpalljen e rezultatit përfundimtar dhe certifikimin e tij, varet tashmë nga Gjykata Supreme për shkak të një ankese të Lëvizjes Vetëvendosje për numërimin e rreth 5 mijë votave të ardhura nga diaspora në Kosovë, jashtë afatit kohor ligjor. Kjo ankesë fillimisht ishte dërguar në Panelin për Ankesa dhe Parashtresa ( PZAP), por ishte kthyer si kërkesë e pabazë. Më pas, Vetëvendosja e deponoi të njëjtën kërkesë edhe në Gjykatën Supreme, e cila vendosi pro ankesës së Vetëvendosjes dhe përmes një aktgjykimi e riktheu lëndën në PZAP. Kurse PZAP, edhe këtë herë lëndën e ka refuzuar si të pabazuar. Në një komunikatë për media, PZAP thotë se “pala mund të parashtrojë ankesë në Gjykatën Supreme të Kosovës, brenda afatit ligjor prej 24 orëve, nga momenti i pranimit të vendimit. Ndërsa Gjykata Supreme e Kosovës duhet të vendosë lidhur me ankesën brenda afatit prej 72 orëve”. Lëvizja Vetëvendosje e dorëzoi sërish ankesën në Gjykatën Supreme për 4,639 zarfe me fletëvotime të diasporës, të cilat nga vendet përkatëse u nisën para ditës së zgjedhjeve, por në Kosovë mbërritën pas 6 tetorit. Vetëvendosje beson se ka marrë mbështetje të gjerë në diasporë.