Britania shkon në zgjedhje të reja brenda dhjetorit
Boris Johnson arriti të bindë deputetët britanikë për të mbajtur zgjedhje të reja brenda muajit dhjetor. Tani ata janë duke diskutuar thjesht datën, nëse do të mbahen më 9 apo më 12 dhjetor. Kryetari i Partisë Laburiste të Britanisë së Madhe, Jeremy Corbyn, njoftoi se partia e tij është e gatshme për zgjedhje të përgjithshme tashmë që Bashkimi Europian ia dha vendit edhe tre muaj kohë shtesë, si afat për arritjen e marrëveshjes së brendshme në lidhje me kushtet e Brexit- it, largimit të Mbretërisë së Bashkuar nga BE- ja. Përkrahje për mbajtje të zgjedhjeve në dhjetor kanë ofruar më parë edhe Partia Liberal- Demokrate dhe Partia Kombëtare Skoceze. Kështu, besohet se nisma e Kryeministrit Johnson për zgjedhje të parakohshme do të dalë e suksesshme. “Kam thënë vazhdimisht se ne jemi të gatshëm për zgjedhje dhe përkrahja jonë për këtë varet vetëm nga largimi i opsionit të Brexit- it pa marrëveshje. Tani do ta nisim fushatën më ambicioze dhe më radikale për ndryshim të vërtetë. Një ndryshim të tillë, që vendi nuk e ka parë kurrë më parë”, tha Corbyn, lideri i opozitës britanike. Presidenti i Këshillit të Europës, Donald Tusk, njoftoi se vendet anëtare të Bashkimit Europian janë pajtuar që t’i japin Britanisë tre muaj afat shtesë pas 31 tetorit, për ta miratuar marrëveshjen e Brexitit në Parlament. Megjithatë, Johnson sërish po përballet me opozitën nëse zgjedhjet duhet të mbahen më 9 dhjetor, apo datën e tij të preferuar, 12 dhjetor. Nëse mbajtja e zgjedhjeve të reja miratohet në Dhomën e Ulët, më pas vendimmarrja kalon në Dhomën e Lordëve. Po u miratua edhe aty, Parlamenti britanik pritet të shkrihet që ditën e hënën, në mënyrë që palët të nisin fushatën.