“Do nxis udhëheqësit që të zgjidhin ngërçin politik”, ambasadorja e re e SHBA me tri prioritete në Tiranë
YURI KIM, E EMERUAR SI AMBASADORE NE SHQIPERI, FLET PARA SENATIT. NGA FONDET PER USHTRINE, TE NDIKIMI I RUSISE E REFORMA NE DREJTESI
E nominuara nga Presidenti Trump për ambasadore të SHBA- ve në Shqipëri, Yuri Kim, ka raportuar dje para Komisionit për Punët e Jashtme në Senatin Amerikan për objektivat në misionin e saj në vendin tonë.
Në fjalën para senatorëve, diplomatja amerikane tha se do të punojë për të shtuar ndihmën amerikane në zgjidhjen e disa prej problemeve në vend. Ambasadorja e ardhshme e SHBA- ve në Shqipëri theksoi se do të bëjë përpjekje që t’i ndihmojë palët që të dialogojnë për të zgjidhur atë që ajo e quajti “ngërç politik”. “Unë do të vazhdoj të promovoj zhvillimin demokratik të Shqipërisë si një komb demokratik. Në terma imediatë, unë do të shtyj liderët e Shqipërisë për të zgjidhur bllokimin aktual politik në një mënyrë që përforcohet rruga e Shqipërisë për anëtarësim në BE, si dhe një paraqitje sa më e mirë në kuadër të mbajtjes së presidencës së OSBE- së në vitin 2020. Aspiratat e Shqipërisë në BE dhe reformat do të çojnë në më shumë prosperitet dhe stabilitet për vendin dhe rajonin. Do ta bëjë Shqipërinë gjithashtu një aleat më të fortë, më të aftë për SHBA- të”, tha Yuri Kim.
DREJTËSIA Yuri Kim shtoi në fjalën e saj se inkurajon Shqipërinë të zbatojë plotësisht Reformën në Drejtësi, përfshirë kontrollin e figurës së gjyqtarëve dhe prokurorëve dhe krijimin e strukturave të posaçme për luftën kundër korrupsionit dhe krimit të organizuar. Ajo tha se sheh si përparësi edhe ndihmën teknike për Shqipërinë në hetimin, ndjekjen dhe ndëshkimin e korrupsionit dhe krimit të organizuar ndërkombëtar. Kim tha se SHBA- të kanë një mik të fortë dhe besnik te Shqipëria dhe se është e domosdoshme që t’i mbajnë pranë miq të tillë. “Ne kemi një mik të fortë dhe besnik në Shqipëri dhe është e domosdoshme që ne të mbajmë miq si Shqipëria pranë nesh, veçanërisht përballë sfidave tona strategjike për interesat, vlerat dhe institucionet tona të përbashkëta. Nëse konfirmohem, unë do të përparoja në tri prioritete: Së pari, unë do të inkurajoja Shqipërinë që të ruajë kursin e saj të qëndrueshëm për të arritur premtimin e investimit 2% të buxhetit të saj për mbrojtjen deri në vitin 2024, në mënyrë që Shqipëria të jetë një aleat edhe më i fortë e më i aftë. Që nga viti kur Shqipëria u anëtarësua në NATO në 2009, ushtarët shqiptarë kanë luftuar krah për krah me trupat amerikane. Në Afganistan, shqiptarët kanë qenë me ne duke asistuar në stërvitjen e forcave afgane. Shqipëria ka qenë gjithashtu një partnere e besueshme në aleancën globale për të mposhtur ISIS- in. Aksionet e Shqipërisë demonstrojnë se ajo jo vetëm që vlerëson përfitimet e NATO- s, por njeh edhe përgjegjësitë që ka pjesëmarrja në NATO. Më shumë në mënyrë themelore do të forcoja asistencën diplomatike dhe të huaj të ndihmës amerikane për forcimin e sundimit të ligjit, luftimin e korrupsionit dhe krimit të organizuar. SHBA duhet të vazhdojë të inkurajojë Shqipërinë të zbatojë plotësisht Reformën në Drejtësi, të vazhdojë vetingun e gjyqtarëve e të prokurorëve dhe të krijojë SPAK- un dhe Byronë Kombëtare të Hetimit. Unë gjithashtu do të shtoj angazhimin dhe ndihmën teknike të SHBA- ve në ndjekjen penale, luftën ndaj korrupsionit dhe krimit të organizuar ndërkombëtar”, u shpreh e nominuara për ambasadore të SHBAve në Shqipëri. NDIKIMI RUSO- KINEZ
Duke iu përgjigjur pyetjeve të senatorëve, Yuri Kim trajtoi disa çështje të rëndësishme në planin ndërkombëtar, duke vënë theksin te ulja e ndikimit rus dhe kinez në Shqipëri, i cili në vitet e fundit është rritur sidomos në planin ekonomik. Sipas Kim, fatmirësisht, përpjekjet e Rusisë në këtë aspekt nuk kanë pasur shumë efekt. Diplomatja amerikane tha se SHBA duhet t’i ndihmojë shqiptarët të forcojnë institucionet, në mënyrë që ata të jenë më rezistentë ndaj përpjekjeve të Rusisë dhe të depërtimit ekonomik të Kinës. “Unë mendoj se mënyra për të ecur përpara bazohet në tri gjëra: solidariteti, integrimi dhe bashkëpunimi. Duke qenë se Rusia nuk ka një tërheqje më të madhe në Shqipëri, ne do të përpiqemi për t’i mbajtur më afër vende të tilla. Mendoj se në Shqipëri duhet të bëjmë dy gjëra. T’i ndihmojmë shqiptarët që t’i forcojnë institucionet e tyre, në mënyrë që të jenë sa më rezistentë ndaj Rusisë, por dhe Kinës që po tenton të futet në ekonominë e tyre”, u shpreh diplomatja amerikane. KRIMI I ORGANIZUAR
Ambasadorja e ardhshme e SHBA- ve në Tiranë, Yuri Kim, ka folur para Senatit Amerikan edhe për një problem që vijon të mbetet shqetësues për Shqipërinë, siç është trafiku ndërkombëtar i qenieve njerëzore. Sipas saj, një sfidë për Shqipërinë, ku SHBA duhet t’i qëndrojë pranë, është edhe trajtimi i luftëtarëve të ISIS- it me origjinë shqiptare. “Shqipëria ka një reputacion për të ardhur keq në këtë aspekt, për krimin e organizuar, veçanërisht trafikun e qenieve njerëzore, të grave dhe narkotikëve. Është një problem shumë serioz. Për terroristët e ISIS- it që janë të arrestuar, kjo është një sfidë e madhe për administratën. Nëse konfirmohem ambasadore, do të punoj fort me qeverinë shqiptare për ta zgjidhur këtë çështje”, është shprehur Kim para Komisionit të Senatit Amerikan për Punët e Jashtme.
Unë do të vazhdoj të promovoj zhvillimin demokratik të Shqipërisë si një komb demokratik. Në terma imediatë, unë do të shtyj liderët e Shqipërisë për të zgjidhur bllokimin aktual politik në një mënyrë që përforcohet rruga e Shqipërisë për anëtarësim në BE, si dhe një paraqitje sa më e mirë në kuadër të mbajtjes së presidencës së OSBE- së në vitin 2020
Shqipëria ka një reputacion për të ardhur keq në këtë aspekt, për krimin e organizuar, veçanërisht trafikun e qenieve njerëzore, të grave dhe narkotikëve. Është një problem shumë serioz. Për terroristët e ISIS- it që janë të arrestuar, kjo është një sfidë e madhe për administratën. Nëse konfirmohem ambasadore, do të punoj fort me qeverinë shqiptare për ta zgjidhur këtë çështje