Përfaqësuesi i Rusisë në BE: Bashkohuni me ne, do përfitoni
Unioni Euroaziatik sfidon BE- në, Serbia pranon, Maqedonia jo
Moshapja e negociatave për anëtarësim në Bashkimin Europian për Shqipërinë dhe Maqedoninë e Veriut më 18 tetor ka sjellë ofertën e parë për dy vendet ballkanike.
Rusia shikohet si fuqia botërore më e interesuar që të rrisë ndikimin e saj në këto dy vende dhe hapi konkret është prezantuar nga përfaqësuesi i Përhershëm i Rusisë në BE, Vladimir Chizhov. Ky i fundit, gjatë punimeve të Unionit Ekonomik Euroziatik në Verona, paraqiti ftesën për të dyja vendet që t'i bashkohen këtij Unioni. Në fjalën e tij të shkurtër, Chizhov ishte shumë i qartë, duke nënvizuar faktin te përfitimet e mëdha që do të merrnin këto vende, që sipas tij, janë shumë herë më të mëdha nga ato që do të mund të marrin nga anëtarësimi në Bashkimin Europian. "Shqipëria dhe Maqedonia e Veriut do të gjejnë mirëkuptim më shpejt në Unionin Ekonomik Euroaziatik sesa në BE. Unë jam i sigurt se vendet, të cilat janë kandidate për anëtarësim në BE dhe së fundmi janë ' vënë në akull' nga Brukseli, mund të marrin më shumë përfitime në Unionin Ekonomik Euroaziatik", theksoi diplomati rus. Unioni i Euro- Azisë është një organizatë e krijuar në vitin 2014 nga Rusia dhe në të marrin pjesë disa vende të Azisë Perëndimore, por edhe të Europës. Bjellorusia, Kazakistani, Armenia, Kirgistani dhe Rusia ishin vendet e para që firmosën marrëveshjen për aderim në këtë organizatë që në vitin 2014. Por këtë vit, Unionit Euroaziatik iu bashkua edhe Serbia. Kryeministrja serbe, Ana Bërnabiç e firmosi marrëveshjen për aderim në këtë organizatë të premten e shkuar edhe pse ka filluar procesin e negociatave me Bashkimin Europian prej disa vitesh. Në momentin e firmosjes së kësaj marrëveshje, karshi Beogradit pati disa thirrje për t'u tërhequr nga kjo nismë. Sa i përket Bashkimit Ekonomik Euroaziatik, pika më e fortë e tij lidhet kryesisht me pozicionin gjeografik që qëndron midis Bashkimit Europian dhe Kinës. Ky Union ka marrëveshje të Tregtisë së Lirë me Kinën, Iranin, Singaporin dhe
Vietnamin. Por edhe potenca e Rusisë si ideatorja e këtij forumi është një garanci më tepër. Aktualisht Moska është e përfshirë në disa projekte të rëndësishme në Ballkan, ku ndër më të rëndësishmit cilësohet angazhimi i saj për të financuar dhe ndihmuar në ndërtimin e hekurudhës me shpejtësi të lartë midis Serbisë dhe Portit të Tivarit në Malit të Zi. Sakaq, pas kësaj ftese zyrtare nga përfaqësuesi i Përhershëm i Rusisë në BE, Vladimir Chizhov nga Tirana zyrtare ende nuk ka asnjë reagim. Më herët, Kryeministri Rama ka folur për një rrezik të rritjes së ndikimit rus në gjithë rajonin e Ballkanit. Nga ana tjetër, Maqedonia e Veriut e ka refuzuar menjëherë këtë ofertë. Ishte Kryeministri, Zoran Zaev, i cili ka deklaruar se deri tani nuk i ka ardhur një ftesë e tillë, por shtoi se uron që të mos vijë. "Është e vështirë të arrihet në një thirrje të tillë. Sepse nuk më shkon as ndërmend një punë e këtillë. Jo, nuk kemi ftesë të tillë dhe shpresoj se as që do të mbërrijë", deklaroi Zoran Zaev.