Kim: Ndihmojmë shqiptarët që t'i rezistojnë Rusisë
Ambasadorja e re e SHBA i druhet ndikimit rus dhe kinez në Shqipëri
Sekretari i Përgjithshëm i Partisë Socialiste, Taulant Balla, ka depozituar në Kuvend një projektrezolutë kundër ndikimit rus në fushatat elektorale dhe përhapjen e "fake news". Në një prononcim për mediet, Balla e cilësoi këtë nismë të tij si shumë të domosdoshme në momentin kur rreziku i rritjes së ndikimit rus në rajonin e Ballkanit dhe në Shqipëri më veçanërisht është më i lartë se kurrë. Sipas Ballës, Shqipëria tashmë e ka një shembull se paratë ruse përdoren në mënyrë të dyshimtë edhe nga politikanët shqiptarë, duke sjellë në vëmendje akuzën ndaj kryetarit të Partisë Demokratike, Lulzim Basha.
Rreziku nga ndikimi rus në vendet e Ballkanit Perëndimor ka qenë një diskutim i përhershëm nga zyrtarët e Shteteve të Bashkuara të Amerikës, por edhe Bashkimit Europian. Çështja u theksua edhe nga e nominuara për ambasadore të SHBA- vë në Shqipëri, Yuri Kim, gjatë raportimit të saj në Senatin Amerikan para se të votëbesohet për të filluar zyrtarisht misionin e saj në Tiranë. Duke iu përgjigjur pyetjeve të senatorëve, Yuri Kimtha tha se fatmirësisht, përpjekjet e Rusisë në këtë aspekt nuk kanë patur shumë efekt në Shqipëri. Por Yuri Kim nënvizoi në përgjigjen e saj se SHBA duhet t'i ndihmojë shqiptarët të forcojnë institucionet demokratike, si një mënyrë që ata të jenë më rezistentë ndaj përpjekjeve të Rusisë. Përveç Rusisë, ajo foli edhe për një mundësi të rritjes së ndikimit kinez në Shqipëri veçanërisht në sektorin ekonomik. "Unë mendoj se mënyra për të ecur përpara bazohet në tri gjëra, solidariteti, integrimi dhe bashkëpunimi. Duke qenë se Rusia nuk ka një tërheqje më të madhe në Shqipëri, ne do të përpiqemi t'i mbajmë më afër vende të tilla. Mendoj se në Shqipëri duhet të bëjmë dy gjëra. T'i ndihmojmë shqiptarët që të forcojnë institucionet e tyre, në mënyrë që të jenë sa më rezistentë ndaj Rusisë, por dhe Kinës që po tenton të futet në ekonominë e tyre", u shpreh diplomatja amerikane në përgjigje të interesit të senatorëve gjatë raportimit. Rreziku i rritjes së ndikimit rus në rajonin e Ballkanit Perëndimor dhe më veçanërisht në Shqipëri pas vendimit negativ të Këshillit Europian për negociatat, në senatin amerikan u cek edhe nga senatori Mit Romnei, i cili vuri theksin në mbështetjen që duhet të jepet ndaj Shqipërisë për t'i bërë ballë këtij presioni dhe insistimi të Rusisë. E nominuara e Presidentit Trump për ambasadore të SHBA- ve në Shqipëri, në fjalën e saj theksoi gjithashtu se në mesin e qytetarëve shqiptarë ka një pëlqim shumë të madh për SHBA- të dhe vlerat që ajo përcjell. Kjo gjë e vështirëson depërtimin rus. "Sondazh pas sondazhi tregojnë se mbështetja e shqiptarëve për Shtetet e Bashkuara të Amerikës mbetet ndër më të lartat në botë. Ne kemi një mik të fortë dhe besnik në Shqipëri dhe është e domosdoshme që ne të ruajmë miq si Shqipëria pranë nesh, veçanërisht përballë sfidave strategjike për interesat, vlerat dhe institucionet tona të përbashkëta", është shprehur diplomatja amerikane në fjalën e saj para senatorëve.