Meta në Kroaci: Trefishojmë përpjekjet për reformat
"Forcojmë bashkëpunimin, me bazë lidhjet e forta tradicionale"
Në vijim të vizitës së tij në Kroaci, Presidenti Meta u prit në një takim nga Kryeministri i Kroacisë, Andrej Plenkoviç. Kreu i Shtetit e falënderoi Kryeministrin kroat për mbështetjen e madhe dhe pa rezerva që Kroacia i ka dhënë rrugëtimit europian të Shqipërisë. Sipas Metës, marrja e Presidencës së BE nga Kroacia është një mundësi e shkëlqyer për Shqipërinë që t'i hapë negociatat. "Marrja e Presidencës së BE- së për herë të parë nga Kroacia dhe qëndrimi i saj pro zgjerimit, është një mundësi e shtuar për Shqipërinë dhe rajonin në funksion të perspektivës europiane. Do të dyfishojmë e trefishojmë përpjekjet tona në javët që vijnë, në muajt që vijnë, në mënyrë që Samiti i Zagrebit në maj 2020 të rezultojë me një vendim pozitiv për çeljen e negociatave të anëtarësimit me Bashkimin Europian", është shprehur Presidenti. Kreu i shtetit Meta dhe Kryeministri kroat, Plenkoviç, ndanë të njëjtin qëndrim se integrimi europian i Shqipërisë dhe rajonit është e vetmja alternativë e së ardhmes sonë të përbashkët. Liderët ranë dakord se bashkëpunimi ekonomik mes dy vendeve duhet të ngrihet në të njëjtin nivel me partneritetin strategjik dhe bashkëpunimin e shkëlqyer politik, duke theksuar se ndërtimi i gazsjellësit Adriatiko- Jonian IAP, është një mundësi e madhe për zhvillimin e gjithë rajonit të Ballkanit. Gjatë këtij takimi, Meta ka hedhur idenë e një linje direkte ajrore Tiranë- Zagreb, e cila sipas tij do t'i shërbente forcimit të këtij bashkëpunimi, si dhe ndërlidhjes mes dy vendeve. Në ditën e dytë të vizitës së tij në Kroaci, Meta është takuar edhe me Kryeparlamentarin e Kroacisë, Gordan Jandrokoviç, nga ku ka marrë edhe një konfirmimin për mbështetjen e Kroacisë ndaj Shqipërisë në rrugëtimin europian. "Kënaqësi e veçantë të takoja Kryetarin e Parlamentit kroat, z. Gordan Jandrokoviç. Thellimi i bashkëpunimit ndërmjet dy parlamenteve do t'i japë një impuls të ri forcimit të marrëdhënieve të shkëlqyera mes dy vendeve, si dhe procesit të integrimit europian të Shqipërisë. I lumtur që komuniteti shqiptar në Kroaci përfaqësohet në Parlamentin kroat me deputeten e nderuar, znj. Ermine Lekaj Prljaskaj, një tjetër tregues i lidhjeve të forta tradicionale shqiptarokroate", shkruan Meta në rrjetet sociale për këtë takim. Më herët, në ditën e parë të vizitës së tij në Kroaci, Presidenti Ilir Meta zhvilloi dhe një takim me homologen e tij, Kolinda Kitaroviç, ku edhe është nderuar me një medalje nderi.