Arrestohet hajduti i urbanëve, "arratiset" ustai 65- vjeçar
Një 42- vjeçar që vidhte pasagjerët e urbanëve në Tiranë, është arrestuar dje gjatë një operacioni policor të koduar "Stacioni i fundit", që zhvilluan shërbimet e Komisariatit Nr. 3. Policia tha dje se operacioni është organizuar për zbardhjen, dokumentimin dhe vënien para përgjegjësisë ligjore të autorëve të vjedhjeve të portofolave në linjat e autobusëve urbanë të Tiranës. Pas përfundimit të veprimeve hetimore, Policia zbardhi dhe dokumentoi me prova ligjore edhe 5 raste të vjedhjes së portofolave. Përveç hajdutit të arrestuar, i cili ka qenë i dënuar edhe më parë për vjedhje, Policia ka shpallur në kërkim edhe një 65- vjeçar, i cili arriti t'u shpëtonte prangave kur u kap miku i tij. Edhe personi që u shpall në kërkim, ka qenë i arrestuar më parë për vjedhje. "Operacion policor i koduar ' Stacioni i fundit', zhvilluar nga Komisariati i Policisë Nr. 3. Operacioni për zbardhjen, dokumentimin dhe vënien para përgjegjësisë ligjore të autorëve të vjedhjeve të portofolave në linjat e autobusëve urbanë të Tiranës. Zbardhen dhe dokumentohen me prova ligjore 5 raste të vjedhjes së portofolave. Në pranga, një shtetas dhe një tjetër shpallet në kërkim", tha zyrtarisht Policia e Tiranës. Policia tha dje se shërbimet e Komisariatit të Policisë Nr. 3, nisur nga shqetësimet dhe kallëzimet e bëra nga qytetarët për vjedhjet e portofolave në autobusët e linjës urbane të ' Tiranës së Re', nën drejtimin e Prokurorisë së Rrethit Gjyqësor Tiranë, organizuan operacionin policor të koduar "Stacioni i fundit". Gjatë këtij operacioni u bë arrestimi i shtetasit me iniciale M. Xh., 42 vjeç, banues në Tiranë, i dënuar më parë për "Vjedhje". Gjithashtu, u shpall në kërkim shtetasi me iniciale V. J., 65 vjeç, banues në Tiranë, po ashtu i dënuar më parë për "Vjedhje". Në sajë të materialeve të administruara nga Policia, këqyrjes së pamjeve filmike dhe veprimeve të tjera hetimore, rezulton se këta dy shtetas, në bashkëpunim me njëri- tjetrin, janë autorë edhe të 5 rasteve të tjera të vjedhjeve të portofolave. Konkretisht, ata dyshohet të jenë autorë të vjedhjes së portofolit të shtetasit S. J., ngjarje e ndodhur më datë 28 tetor; vjedhjes së portofolit të shtetases B. D., e ndodhur po më datë 28 tetor; vjedhjes së portofolit të shtetases D. S., e ndodhur më datë 5 mars të këtij viti; vjedhjes së portofolit të shtetases M. K., e ndodhur më datë 24 mars të këtij viti; vjedhjes së portofolit të shtetases Xh. L., e ndodhur më datë 2 maj të këtij viti.