NË GUSHT U ZBULUA NJË TJETËR RAST NË FSHATIN FAG TË DAJTIT

Më 19 gusht të këtij viti, Policia arrestoi një 55- vjeçar, ndërsa në kërkim u shpall djali i tij, pasi akuzoheshin për kultivim të lëndëve narkotike kanabis. Sipas njoftimit të Policisë, arrestimi i tyre u bë në sajë të operacionit "Fag", ku veç bimëve narkotike u sekuestruan edhe armë. Policia tha se arrestimi i këtij shtetasi dhe shpallja në kërkim e djalit të tij u bë pasi gjatë kontrollit të ushtruar nga ana e Policisë për parandalimin dhe goditjen e kultivimit të bimëve narkotike, në brendësi të pyllit të fshatit Fag të Dajtit, janë konstatuar të mbjella fidanë kanabis. "Finalizohet operacioni policor antikanabis, i koduar ' Fag'. Operacioni nga Komisariati i Policisë Nr. 4 Tiranë. Goditet një rast i tentativës për kultivim të bimëve narkotike. Në pranga 55- vjeçari, ndërsa djali i tij shpallet në kërkim, si autorë të dyshuar të kultivimit të bimëve narkotike. Në vijim të punës për parandalimin, evidentimin dhe goditjen e veprimtarisë kriminale në fushën e kultivimit të bimëve narkotike, si rezultat i kontrollit të territorit, shërbimet e Komisariatit të Policisë Nr. 4, kanë bërë të mundur arrestimin e shtetasit: A. 55 vjeç, lindur dhe banues në fshatin Fag të Njësisë Administrative Shëngjergj, i dënuar më parë për veprën penale ' Kultivimi i bimëve narkotike'. Gjithashtu, kanë shpallur në kërkim djalin e tij, shtetasin E. A. Arrestimi i këtij shtetasi dhe shpallja në kërkim e djalit të tij u bë, pasi gjatë kontrollit të ushtruar nga ana e Policisë për parandalimin dhe goditjen e kultivimit të bimëve narkotike, në brendësi të pyllit të fshatit Fag, janë konstatuar të mbjella fidanë kanabis. Si rezultat i punës hetimore dhe provave ligjore të sekuestruara në vendin e ngjarjes, dyshohet se babë e bir janë autorë të kësaj vepre penale. Gjatë kontrollit të ushtruar në banesën e tyre, Policia gjeti dhe sekuestroi në cilësinë e provës materiale 65 fishekë", deklaronte zyrtarisht Policia në gusht.