Kërkohen 10 vite burg për anëtarin e Habilajve, zbardhen përgjimet e reja
Nga sekuestrimi i 4 tonëve kanabis, te mjeti lundrues me të cilin do dërgohej në Itali, si u kap Koçerri në përgjime me Habilajt
Prokuroria për Krime të Rënda kërkoi shpalljen fajtor të Armand Koçerrit dhe dënimin e tij në total me 10 vite burg. Koçerri është pjesë e grupit të Habilajve, por pak javë më parë dosja ndaj tij u veçua nga pjesa tjetër e grupit që ndodhen të arrestuar në Itali. Në seancën e djeshme, prokurorët i atribuuan të pandehurit tentativën e trafikimit të 3978 kg kanabis, ndërsa pretenduan se ka mbajtur kontakte të qëndrueshme me vëllezërit Habilaj dhe pjesën tjetër të grupit që do të gjykohen në një procedim të lidhur për trafik droge. Prokuroria paraqiti një sërë përgjimesh dje në sallën e gjyqit, për të treguar bashkëpunimin e tij me anëtarë të grupit dhe bashkëpunimin me punonjës Policie. "Më datë 18.10.2017, gjatë kontrollit të banesës së të pandehurit Armand Koçerri, në fshatin Babicë e Vogël, Vlorë, është sekuestruar sasia 3978 kg lëndë narkotike e llojit kanabis sativa e përpunuar dhe paketuar e bërë gati për trafikimin e saj. Nga hetimi rezulton se kjo sasi lënde narkotike është siguruar dhe magazinuar nga i pandehuri Armand Koçerri, në bashkëpunim me anëtarët e tjerë të grupit kriminal, Moisi Habilaj dhe Florian Habilaj, të cilët rezultojnë se gjatë kohës së ushtrimit të aktivitetit kriminal të trafikimit të lëndëve narkotike nga Shqipëria në Itali, ato kanë pasur takime dhe komunikime telefonike me njëritjetrin në Vlorë", tha dje Prokuroria. Sipas kësaj të fundit, kontaktet e tyre faktohen dhe dokumentohen nga përgjimet telefonike të subjekteve të hetuara, ekspertimet dhe analizimi i të dhënave telefonike. Ndërsa rezulton se i pandehuri, Armand Koçerri, kishte të regjistruar në telefonin e tij të gjithë numrat e anëtarëve të këtij grupi kriminal, Moisi Habilaj, Florian Habilaj, Nezar Seiti dhe Tigrens Mezuraj. Trafikimi i kësaj lënde narkotike do të bëhej me anë të një mjeti lundrues të sekuestruar më datë 18.10.2017, nga Policia Gjyqësore gjatë kontrollit në objektin "Fabrikë e Vajit", në pronësi të të pandehurit Florian Habilaj, që ndodhej po në fshatin Babicë e Vogël, Vlorë. "Ky mjet lundrues rezultonte në përdorim të të pandehurit Moisi Habilaj. Gjatë kohës që po përgatitej trafikimi i kësaj lënde narkotike, anëtarët e grupit kriminal kanë bërë biseda telefonike dhe takime mes tyre lidhur me lëndën narkotike që do të trafikohej dhe marrëdhëniet me Policinë. Ky fakt dokumentohet me procesverbalet e transkriptimit të përgjimeve telefonike të kryera", tha dje prokurori.