Bashkitë me borxhe për sigurimet e pensioneve, Ministria zgjidh ngërçin
Pagesat e kontributeve do kryhen njëkohësisht me pagesën e borderosë dhe jo pas 20 ditëve si në parashikimin e mëparshëm
Kur situata e krijuar nga bashkitë, të cilat nuk kanë paguar në kohë sigurimet shoqërore për efekt pensioni ka dalë jashtë çdo parashikimi, Ministria e Financave ka ndërmarrë hapin e radhës.
Dje, përmes një njoftimi, është bërë i ditur ndryshimi i mënyrës së pagesës për kontributet. Kështu, nëse më parë bëhej derdhja e pagës dhe pas 20 ditësh alokohej fondi për sigurimet, me ndryshimet e bëra, si paga, ashtu edhe sigurimet në adresë të Drejtorisë së Tatimeve, do të paguhen në të njëjtën datë. "Ministria e Financave dhe Ekonomisë sqaron opinionin publik se këto detyrime nuk kanë nisur sot, por ato datojnë shumë më herët. Ministria e Financave dhe Ekonomisë është angazhuar në terma konkretë, duke realizuar një ndryshim në Udhëzimin e Zbatimit të Buxhetit 2019, përmes të cilit specifikohet se pagesat e sigurimeve shoqërore të institucioneve buxhetore do të kryhen njëkohësisht me pagesën e borderosë dhe jo pas 20 ditëve si në parashikimin e mëparshëm. Ndërkohë, Drejtoria e Përgjithshme e Thesarit, po në bazë të këtij Udhëzimi, siguron zbatimin me rigorozitet të këtij rregulli të ri që prej muajit tetor 2019".
BORXHI Në listën e zezë të "borxhlinjve", krahas 18 mijë subjekteve private, janë edhe 61 bashki të vendit, të cilat nga 2012 e deri më tani, u janë shmangur detyrimeve. Mosderdhja e sigurimeve shoqërore ka pasoja direkte në skemën e pensioneve. Kjo papërgjegjshmëri e treguar nga njësitë e qeverisjes vendore rrezikon të krijojë probleme të rënda sociale në të ardhshmen, duke vënë në rrezik pagesat e pensioneve për qindra punonjës, të cilët sot gjenden përballë faktit se kanë punuar në të zezë përgjatë 7 viteve të fundit. Tirana është bashkia që kryeson listën, me stokun më të madh të detyrimeve të papaguara. Referuar raportit të Financave Vendore, rezulton se në total, deri në qershor të këtij viti, stoku i borxheve të pushtetit vendor arriti në 6,2 miliardë lekë, ose thënë ndryshe 62 milionë dollarë. Nga këto, detyrimi i krijuar nga Bashkia Tiranë është rreth 1,9 miliardë lekë apo 30,1%, ndjekur nga Bashkia Pogradec me 6.6% të stokut; Bashkia Kavajë me rreth 6,5% e totalit dhe Bashkia Vlorë me rreth 6,4% të totalit të detyrimeve të prapambetura.
MINISTRIA Lidhur me borxhet e krijuara, Ministria e Financave ka shprehur angazhimin për monitorimin e bashkive për zerimin e tyre. "Në mënyrë paralele,
Drejtoria e Përgjithshme e Tatimeve dhe Instituti i Sigurimeve Shoqërore po ndjekin intensivisht rakordimin dhe shlyerjen hap pas hapi të këtyre detyrimeve të maturuara. Ky borxh në vetvete është një proces dinamik, i cili ndikohet edhe nga cikli i rritjes dhe zhvillimit ekonomik të një vendi. Ministria e Financave dhe
Ekonomisë siguron qytetarët shqiptarë se ka ndërmarrë të gjitha masat e nevojshme, brenda hapësirave që lejon ligji, që të bëjë të mundur amortizimin deri në eliminim të të gjitha detyrimeve të prapambetura", thuhet më tej në njoftim. Ndërkohë, masa janë ndërmarrë edhe përmes aksionit antiinformalitet. Ministria e Financave ka paralajmëruar bizneset se do të përballen jo vetëm me masa administrative, por edhe me bllokim të aktivitetit nëse konstatohen me shkelje. Deklarimi i punonjësve është një prej aspekteve të operacionit të nisur. "Drejtoria e Tatimeve në bashkëpunim edhe me Inspektoratin e Punës janë angazhuar në kuadër të planit operacional stop informalitetit për monitorin e deklarimeve të punonjësve dhe të pagave nga subjektet private".