Po trafikonin kanabis çokollatë nga Fieri në Vlorë, tre në pranga
FIER – Transportuan mbi 40 kg kanabis sativa në formë çokollate nga Fieri në Vlorë, kapen në flagrancë. Tre persona, dy nga Fieri dhe një tjetër nga Vlora, janë arrestuar pas një hetimi gati 1- mujor. Policia thotë se bëhet fjalë për një grup që prodhonte dhe shpërndante lëndë narkotike brenda vendit. Autorët u mbajtën në përgjim, ndërsa finalizimi i operacionit ka zgjatur disa orë, pasi forcat e rendit ndoqën nga afër momentin e transportimit të lëndës narkotike nga Fieri për në Vlorë, ku edhe u krye arrestimi i tyre. “Pas një hetimi njëmujor me përdorimin e metodave speciale të hetimit, nga Seksioni për Hetimin e Narkotikëve në Drejtorinë Vendore të Policisë Fier, në bashkëpunim me Task- Forcën e Prokurorisë së Rrethit Gjyqësor Fier, Forcën e Posaçme Operacionale në Drejtorinë e Përgjithshme të Policisë së
Shtetit dhe DVP Vlorë u finalizua operacioni antidrogë i koduar ‘ Zhupani’. Operacioni filloi që në orët e para të mëngjesit në lagjen ‘ 1 Maj’, në Fier dhe u finalizua në qytetin e Vlorës. Në përfundim të këtij operacioni, u bë arrestimi në flagrancë i shtetasve: A. M., 40 vjeç, banues në Fier., M. K., 46 vjeç, banues në Fier dhe K. Sh., 40 vjeç, banues në Vlorë. Këta shtetas, në bashkëpunim me njëritjetrin, prodhonin dhe shisnin lëndë narkotike në Qarkun e Fierit dhe Vlorës. Gjatë operacionit u sekuestruan 43.5 kg lëndë narkotike e dyshuar kanabis në formë çokollate”, bëhet e ditur nga Policia, ndërkohë që materialet do t’i kalojnë Prokurorisë pranë Gjykatës së Shkallës së Parë Fier, për veprime të mëtejshme procedurale. m. r