Trupat turke përplasen me Ushtrinë siriane në kufi
Erdogan shpreh dyshime për garancinë e Rusisë për kurdët
Pikërisht atëherë kur dukej se situata në kufirin mes Sirisë dhe Turqisë do të qetësohej pas largimit të të gjithë luftëtarëve kurdë nga zona e sigurisë, ka ndodhur një përballje mes trupave turke dhe atyre të qeverisë siriane.
Sipas mediave shtetërore siriane, trupat e ushtrisë siriane u përleshën me forcat turke në afërsi të qytetit kufitar Ras al Ain të mërkurën. Përplasja ndodhi pasi Ankaraja zyrtare tha se rezervonte të drejtën për të filluar një tjetër sulm ndërkufitar kundër milicisë kurde të YPG. Mediat siriane kanë raportuar se trupat turke po mbanin nën kontroll fshatra në Ras al Ain. Rebelët e mbështetur nga turqit thanë se kishte pasur përleshje të përhershme midis trupave turke dhe siriane ditët e fundit në jug të qytetit, që Turqia e mori nën kontroll pasi largoi kurdët në fillim të këtij muaji. Turqia e nisi ofensivën pas largimit të trupave amerikane nga zona, me vendim të Presidentit Donald Trump, pas kërkesës së Ankarasë për të krijuar një zonë sigurie prej 30 km në kufi, duke shtyrë luftëtarët kurdë të YPG të paktën 30 km në jug të kufirit. Pjesë e marrëveshjes paralele të Turqisë me Rusinë, ishte që trupat siriane të mos lejojnë afrimin e forcave kurde. Në Ankara, Presidenti Erdogan u tha ligjvënësve nga Partia e tij AK, se Turqia ka informacione që YPG nuk e ka përfunduar tërheqjen, me gjithë deklaratën nga Rusia të martën, se “pastrimi” i zonës kishte përfunduar. “Megjithëse informacioni në duart tona sugjeron që kjo nuk ka pasur sukses në një kuptim të plotë, ne do t’u japim përgjigjen tonë atyre pas vlerësimeve në terren”, tha ai. Ankaraja e shikon YPG- në si një organizatë terroriste për shkak të lidhjeve të saj me militantët kurdë në Turqinë juglindore dhe synon të krijojë një “zonë të sigurt” në veri të Sirisë duke e “pastruar” nga grupi që e sheh si kërcënim për stabilitetin e Turqisë. Erdogan tha: “Nëse ne shohim se anëtarët e organizatës terroriste nuk janë zhvendosur larg 30 km ose nëse vazhdojnë sulmet, ne rezervojmë të drejtën për të kryer operacionin tonë”.