Kurti dhe Osmani takohen për qeverinë, fotoja merr pëlqime rekord
Megjithëse certifikimi i zgjedhjeve nuk është bërë ende në Kosovë për shkak të një ankese nga Lëvizja Vetëvendosje për votat nga diaspora, duket se LDK dhe LVV i kanë intensifikuar përpjekjet për krijimin e koalicionit qeveritar. Të mërkurën, kreu i LVV, Albin Kurti, ka postuar në "Facebook" një foto me kandidaten e LDK- së për Kryeministre, Vjosa Osmani, e cila ka marrë mbi 27 mijë pëlqime dhe rreth 2 mijë komente brenda tri orësh. Dy kandidatët që janë më të votuarit në nivel vendi në Kosovë, kanë publikuar fotografi nga takimi në një nga restorantet e Prishtinës, duke marrë mijëra reagime pozitive në rrjetet sociale. Kurti dhe Osmani u takuan për të diskutuar rreth krijimit të qeverisë së re, pasi VV i fitoi zgjedhjet, duke dalë më pak se një për qind para LDK- së. "Bashkë me Vjosën biseduam sot për përgatitjet për qeverisjen e re dhe sfidat që na presin. Kosova do të dalë nga kriza dhe do të përparojë. Bashkëpunimi ynë është përkushtimi ynë. Qëllimet e mira dhe punët e mbara janë përgjegjësi e jona ndaj qytetarëve të Republikës dhe institucioneve të shtetit", ka shkruar Kurti. Deri tani, bisedimet kishin përparuar vetëm në rangun e grupeve të punës, pasi drejtuesit e Lidhjes Demokratike të Kosovës kanë deklaruar se do të ulen të diskutojnë për postet, pasi të bëhet certifikimi i zgjedhjeve, pasi besonin se rezultati mund të ndryshonte me numërimin e votave me kusht, duke qenë se diferenca mes dy partive ishte shumë e vogël. Nëse LDK do të dilte e para nga ato vota, do të merrte postin e Kryeministrit në koalicionin me Lëvizjen Vetëvendosje! Por nuk pritet më të ketë ndryshim në rezultat, Vetëvendosje mbetet forca e parë politike në Kosovë, edhe pse me një diferencë të vogël, dhe Albin Kurti do të jetë Kryeministri i ardhshëm i Kosovës. Lëvizja Vetëvendosje mund të ketë një thellim të lehtë të rezultatit me votat e diasporës që mbërritën me vonesë në Kosovës, për të cilat Gjykata Supreme urdhëroi KQZ- në të numërohen!