Nga financimi shtetëror, te skema për reklamat në fushatë, drafti i PD për Reformën
Formula e re për promocionin, "Kostoja e reklamave për fushatat të zbritet nga detyrimet që subjektet mediatike i kanë shtetit"
Partia Demokratike do të propozojë financim 100% nga shteti për subjektet politike dhe fushatat zgjedhore. Gazeta "Panorama" zbardh draftin e opozitës për Reformën Zgjedhore, mbi të cilin PD- ja dhe aleatët po punojnë për të paraqitur alternativat e tyre.
Financimi i partive është problematika kryesore që adresohet në draftin e PD- së. "Ndërhyrje ligjore që siguron që financimi i partive politike dhe ai për zgjedhjet të jetë 100% nga buxheti i shtetit, me qëllim shmangien e financimeve private nga burime të dyshimta. Paralelisht me këtë, propozohet kriminalizimi i financimeve private", thuhet në pikën e parë të draftit të PD- së. Partia më e madhe opozitare ngarkon Komisionin Qendror të Zgjedhjeve që të bëjë një listë kostosh reference të detyrueshme, për materiale, infrastrukturë apo aktivitete zgjedhore, me qëllim matjen e shpenzimeve për një kandidat/ parti në fushatën zgjedhore. Po ashtu, PD- ja kërkon që të përcaktohen kriteret e llogaritjes së financimit për një mandat, në mënyrë që të përllogaritet edhe buxheti vjetor i partive. "Përcaktimin e rregullave dhe kritereve detyruese për përllogaritjen e vlerës së financimit për njësi ( vlerë për një zgjedhës dhe/ ose vlerë për mandat dispozicion buxheti i shtetit. Shuma e përllogaritur sipas kritereve duhet të jetë detyruese për t'u vënë në dispozicion sipas ligjit për buxhetin e vitit përkatës", thuhet ndër të tjera në draftin e PD- së. Opozita ka denoncuar shpeshherë lidhjet e "oligarkëve" me pushtetin, të cilët, sipas PD- së, marrin tenderë korruptivë dhe më pas ua kthejnë favoret në fushatat zgjedhore partive politike. Asimilimin e kësaj problematike, PD- ja e reflekton në draftin e vet për Reformën Zgjedhore. "Ashpërsimin e kornizës ligjore që pengon financimin nga subjekte që kanë përfituar nga fonde publike nëpërmjet tenderësh dhe koncesionesh, si dhe ndalime nga përfitimi i tenderëve apo koncesioneve, për një kohë të përcaktuar, nga kompani që kanë financuar partitë politike dhe kandidatët", vijon drafti.
REKLAMAT
Partia Demokratike parashikon gjithashtu në draftin e saj uljen e shpenzimeve për mjetet e propagandës në fushatën zgjedhore. Ndërkohë, sa i përket reklamave në media, PD- ja propozon që ato të mos paguhen në mënyrë të drejtpërdrejtë, por kostoja e reklamave të zbritet nga detyrimet që mediat kanë ndaj shtetit. "Marrja e masave që kostoja e kohës televizive dhe e reklamave të jetë ligjërisht e përcaktuar dhe e unifikuar. Njëkohësisht, përcaktimi i mekanizmave për të garantuar që kostoja e reklamave/ kohës televizive të mos jetë e pagueshme drejtpërdrejtë, por të jetë e zbritshme nga transmetuesit televizivë dhe radiofonikë nga detyrimet që i kanë shtetit". Edhe opozita duket se e ka në fokus parandalimin e financimeve të huaja. PD- ja propozon forcimin e rregullave për ndalimin e plotë të çdo financimi të huaj për subjektet politike/ kandidatët/ fondacionet politike.