U kapën me 32 doza kokainë e kanabis, arrestohen të rinjtë
Policia e Tiranës njoftoi dje se arrestoi dy persona të kapur me 32 doza kokainë. Operacioni është zhvilluar nga forcat "Shqiponja" dhe specialistët e narkotikëve, ndërsa ndalimi i dy të rinjve është bërë në rrugën "Muhamet Gjollesha". Duke iu referuar njoftimit zyrtar të Policisë, shtetasit me inicialet F. M. dhe A. L. janë arrestuar në flagrancë dhe janë referuar në Prokurori për dy vepra penale. "Finalizohet operacioni policor i koduar ' Weekend'. Operacioni u zhvilluar nga forca e posaçme ‘ Shqiponjat’, në bashkëpunim me Seksionin për Hetimin e Narkotikëve. Sekuestrohen 32 doza kokainë, një dozë kanabisi, armë e ftohtë thikë, aparate celular dhe një sasi lekësh të dyshuara të përfituara nga shitja e lëndës narkotike", njoftoi Policia e Tiranës.
OPERACIONI Policia bëri të ditur se dy poseduesit e lëndës narkotike janë vënë në pranga pas një kontrolli të ushtruar, ku u janë gjetur doza kokaine, kanabisi dhe armë të ftohta. Gjithashtu, gjatë arrestimit të të rinjve, janë gjetur edhe një shumë parash e cila dyshohet të jetë krijuar nga aktiviteti kriminal, shitja e lëndëve narkotike në doza të vogla në Tiranë. "Forca e posaçme ' Shqiponjat' në bashkëpunim me Seksionin për Hetimin e Narkotikëve, arrestuan në kuadër të operacionit policor të koduar ' Weekend', shtetasit: F. M., 30 vjeç, dhe A. L., 18 vjeç, të dy banues në Tiranë. Në rrugën ' Muhamet Gjollesha' këta dy shtetas u kapën në flagrancë nga shërbimet e forcës së posaçme ' Shqiponjat' me 32 doza kokainë dhe një dozë kanabisi të bëra gati për shitje. Policia sekuestroi në cilësinë e provës materiale: 32 doza me lëndë të dyshuar narkotike kokainë; një dozë me lëndë të dyshuar narkotike kanabisi; 3 aparate celulare; një armë e ftohtë thikë dhe 66 600 lekë të dyshuara të përfituara nga shitja e lëndës narkotike. Materialet procedurale i kaluan për veprime të mëtejshme Prokurorisë së Rrethit Gjyqësor Tiranë për veprat penale ' Prodhimi dhe shitja e narkotikëve' kryer në bashkëpunim dhe ' Mbajtja pa leje e armëve të ftohta', njoftoi dje Policia e kryeqytetit.