Trump: Kallëzuesi ndaj meje, njeri i Obamës dhe radikal
“Raportimet për mbështetje të shkarkimit, false e të fëlliqura”
Presidenti i SHBAve, Donald Trump, ka folur të dielën me reporterët për sa i përket hetimit për shkarkimin e tij nga Dhoma e Përfaqësuesve, si dhe kallëzuesin e telefonatës “inkriminuese” me Presidentin e Ukrainës për hetimin e Joe Biden, duke e quajtur atë “radikal”.
Presidenti Trump po ashtu i hodhi poshtë sondazhet, që tregojnë se amerikanët e mbështesin hetimin për shkarkimin ndaj tij, si raportime “false” dhe “të fëlliqura”. “Sondazhet e CNN- së janë false. Sondazhet e FOX- it kanë qenë gjithnjë të fëlliqura, u kam thënë atyre të marrin një analist tjetër sondazhesh, por sondazhet e vërteta tregojnë se njerëzit nuk duan t’ia dinë për hetimin mbi shkarkimin. Është një skemë mashtruese. Dhe kallëzuesi duhet të tregohet kush është sepse po jep informacion fals”. Trump e sulmoi kallëzuesin e telefonatës me Ukrainën, i cili nxiti hetimin për shkarkimin, si “një njeri i Obamës”, “antiTrump” dhe “radikal”. “Ai është një njeri i Obamës, ishte i përfshirë me ( John) Brennan ( ish- kreu i CIA- s), Susan Rice ( ish- këshilltare e Sigurisë Kombëtare) që do të thotë Obama, po ai ishte një antiTrump. Ai e urren Trump- in.
Dhe ai është një radikal. Mbase nuk është ai që mendoj, por nëse është ai, ju duhet të nxirrni informacionin”. Trump e bëri të qartë se po iu referohej raportimeve të mediave, kur mendonte për identitetin e kallëzuesit. Në mbrojtje të Trump- it, këshilltarja e Presidentit, Kellyanne Conway, tha se kërkesa e Presidentit ndaj një lideri të huaj për të hetuar një rival politik është “e pahetueshme” dhe vazhdimisht ka mohuar se kjo ka pasur një “quid pro quo” ( shkëmbim shërbimesh) të lidhur me ndihmën ushtarake ndaj Ukrainës. Pak kohë pas telefonatës me Presidentin e Ukrainës, ku kërkonte hetim për ndërhyrjen e dyshuar të Joe
Biden në kohën kur ai ishte zëvendëspresident i SHBA- ve për të shkarkuar Kryeprokurorin ukrainas, që hetonte një kompani ku djali i Biden ishte në bord, Presidenti amerikan bllokoi një ndihmë prej 400 milionë dollarësh dedikuar Ukrainës, e cila u zhbllokua më pas në Kongres. Por Shtëpia e Bardhë këmbëngul se kjo nuk ka lidhje me telefonatën. Ndërkohë, demokratët po diskutojnë strukturën që do të përfshinte seanca dëgjimore publike për hetimin mbi shkarkimin e Donald Trump, përpara Ditës së Falënderimeve në SHBA dhe sipas hetimit, edhe votimin nëse Trump duhej të shkarkohej deri në Krishtlindje, sipas burimeve të CNN- së.