Kaos me Gjykatën Kushtetuese, dy emra për një vend anëtari
Meta dekreton Marsida Xhaferllarin, KED shpalli Arta Vorpsin
Presidenti i Republikës, Ilir Meta, dekretoi dje emërimin e Marsida Xhaferllarit si gjyqtare të Gjykatës Kushtetuese.
Me këtë emërim, Gjykata Kushtetuese mund të bëhet menjëherë funksionale, duke plotësuar kuorumin vendimmarrës me 6 anëtarë, por duket se ringritja e kësaj gjykate po kalon në kaos. Xhaferllari është propozimi i dytë i Presidentit të Republikës, pas zgjedhjes nga ana e Kuvendit të anëtarit të tij, sipas përcaktimit kushtetues. Presidenti Meta e bëri emërimin e anëtares së re në tejkalim të afatit 30- ditor që i jep atij Kushtetuta. Presidenti e argumentoi vonesën me një nen tjetër, po të Kushtetutës, ku përcaktohet rendi i emërimeve të anëtarëve të Gjykatës Kushtetuese. Sipas këtij neni: “Anëtari i parë për t’u zëvendësuar në Gjykatën Kushtetuese emërohet nga Presidenti i Republikës, i dyti zgjidhet nga Kuvendi dhe i treti emërohet nga Gjykata e Lartë. Kjo radhë ndiqet për të gjitha emërimet që do të bëhen pas hyrjes në fuqi të këtij ligji. “Por sipas shumicës socialiste, ky interpretim i Presidentit nuk është i vlefshëm, pasi neni për rendin e emërimeve, sipas saj, lidhet me ripërtëritjen çdo tre vjet të anëtareve të Gjykatës Kushtetuese, pasi ajo të jetë krijuar. Shumica po ashtu argumenton se veprimi i Presidentit për të pezulluar emërimin, në pritje të veprimit të Parlamentit, nuk është i bazuar në ligjin për Gjykatën Kushtetuese. Meqë Presidenti nuk veproi deri më 7 nëntor, kur i skadoi afati 30ditor, Këshilli i Emërimeve në Drejtësi konsideroi se kreu i shtetit nuk ushtroi kompetencën e tij e për pasojë, siç përcakton ligji, automatikisht shpallet i emëruar kandidati i pari në listë, që ishte zonja Arta Vorpsi.
BETIMI Pas veprimit të djeshëm të Presidentit, për të njëjtin vend të Gjykatës Kushtetuese tani janë dy anëtare, Arta Vorpsi dhe Marsida Xhaferllari. Emri i zonjës Vorpsi u shpall në Fletoren Zyrtare, megjithatë ajo nuk mund ta fillojë detyrën pa bërë betimin te Presidenti Meta. Në bazë të vendimit të sotëm, Presidenti Meta pritet të thërrasë për të bërë betimin zonjën Xhaferllari. Është ende e paqartë nëse emërimi i saj do të shpallet në Fletoren Zyrtare apo jo, siç ndodhi me dekretin e Presidentit Meta për zgjedhjet lokale të 13 tetorit. Në gjithë këtë kaos, duket se nuk ka rrugëdalje, për sa kohë Gjykata Kushtetuese, i vetmi organ mbi institucionet e tjera, është vetë ende jashtë funksionit. Procedura kushtetuese për zgjedhjen e anëtarëve të Gjykatës Kushtetuese duhet të ishte vendimi i parë i kësaj gjykate pas nisjes nga puna. Presidenti i Republikës la të kuptohet dje gjatë konferencës për shtyp me gazetarët se do të komunikojë me Kuvendin për betimin e anëtarëve të rinj kushtetues, që u zgjodhën nga Parlamenti me 105 vota. Ndërsa po aq qartë Meta u shpreh se nuk e njeh anëtaren e shpallur në Fletoren Zyrtare, Arta Vorpsin, për shkak se sipas kreut të shtetit, ajo u shpall përmes një procedure mafioze nga drejtuesi i Këshillit të Emërimeve në Drejtësi, Ardian Dvorani.
EMËRIMI Ashtu siç kishte premtuar që do të dekretonte vakancën e dytë 24 orë pas votimit nga ana e Parlamentit, Presidenti i Republikës dekretoi vakancën e dytë në Gjykatën Kushtetuese. Për shkak të axhendës së tij në Samitin e Paqes në Francë, me të ardhur në Aeroportin e Rinasit, kreu i shtetit firmosi emrin e Marsida Xaferllarit, si anëtar të 5- të të Gjykatës Kushtetuese. Sipas ligjit për organizimin dhe funksionimin e Gjykatës Kushtetuese, kreu i shtetit ka 30 ditë kohë nga paraqitja e kandidatëve të KED- it të shprehet me dekret. “Zonja Arta Vorpsi automatikisht është zgjedhur anëtare e Gjykatës Kushtetuese”, deklaroi kreu i Kuvendit, Gramoz Ruçi, në seancën e fundit plenare. Por Presidenca përmes një shkrese zyrtare ka nënvizuar se pas zgjedhjes së emrit të parë, që ishte Besnik Muçi, radha për votim i kalonte Parlamentit dhe më pas sërish Presidentit. Në të kundërt, për kreun e Kuvendit ligji është i qartë, në Kushtetuese emërohet automatikisht kandidati i parë i listës. Gjykata Kushtetuese ka aktualisht dy anëtarë, Vitore Tusha, e vetmja që kaloi vettingun, dhe të zgjedhurin e ri, Besnik Muçi, i dekretuar nga Presidenti, ndërsa Elsa Toska dhe Fiona Papajorgji u votuan nga Kuvendi. Anëtari i pestë duhet të ndahet mes Arta Vorpsit, që u zgjodh automatikisht pasi Presidenti i Republikës nuk e ushtroi të drejtën për të zgjedhur dhe Marsida Xhaferllarin, që Presidenti e dekretoi sot.