Rritja ekonomike, Sejko: Përmirësim në dy vitet e ardhshme
Përkundrejt pritshmërive, është fakt tanimë se situata ekonomike nuk është në ditët e saj më të mira. Ndërsa vuri në dukje se ritmi i rritjes ekonomike ka qenë i ngadaltë, Guvernatori i Bankës së Shqipërisë, Gent Sejko, u shpreh optimist sa i takon ecurisë për dy vitet e ardhshme. Gjatë një takimi me misionin e Fondit Monetar Ndërkombëtar, Sejko vuri në dukje se ritmi i rritjes ekonomike do të vijë në përmirësim përgjatë vitit 2020 dhe 2021, duke mundësuar kthimin e inflacionit në objektiv në afat të mesëm. Më tej, ai evidentoi se ambienti i brendshëm financiar shfaqet stimulues dhe kursi i këmbimit shfaqet relativisht i stabilizuar. Raporti i këmbimit të lekut me euron është më afër ekuilibrit, ndërsa faktorët sezonalë kanë ndikuar në luhatjet e tij. Për sa i përket sektorit bankar, Guvernatori theksoi se ai paraqitet i qëndrueshëm, me tregues që evidentojnë një ambient financiar të gatshëm për të mbështetur më tej zhvillimin ekonomik të vendit. Kredia për sektorin privat shënoi një rritje mesatare prej 7.5% në tremujorin e tretë 2019. Zgjerimi i kërkesës dhe përmirësimi i ofertës së kredisë bankare kanë ndikuar në përshpejtimin e ritmit të rritjes së kredisë. Oferta e kredisë bankare ka ardhur në rritje si pasojë e përmirësimit të vazhdueshëm të ambientit të kreditit dhe të bilancit të sektorit bankar, sikundër tregohet nga rënia në nivelin 10.6% e raportit të kredive me probleme, por edhe nga rritja e konkurrencës në sektor, me përfundimin e procesit të konsolidimit të sektorit bankar.