Dy anëtare për një vend në Kushtetuese, Meta dekreton Xhaferllarin e akuzon kreun e KED: Bën lojëra mafioze
KAOSI ME GJYKATEN, ILIR META FLET EDHE PER BETIMIN E ANETAREVE TE RINJ: PRESIDENTI NUK E KONTESTON ZGJEDHJEN NGA PARLAMENTI
META, DJE NE KONFERENCE PER SHTYP ( MAJTAS) ARTA VORPSI E MARSIDA XHEFERLLARI
Presidenti i Republikës akuzoi dje me një gjuhë të ashpër maxhorancën, por dhe kreun e KED- it, Ardian Dvorani, se duan t’i rrëmbejnë kreut të shtetit të drejtën e dekretimit të anëtarit të Gjykatës Kushtetuese. Përmes një konference për mediat, Meta e akuzoi Dvoranin si një ushtar të partisë që provokoi Presidentin për shkelje të Kushtetutës me kohën kur i dërgoi listat me anëtarët e rinj për në Gjykatë Kushtetuese. Meta, ndërsa vijoi me sulmet ndaj Dvoranit, shtoi se KED nuk u sabotua kot në 2017 dhe 2018, por, sipas tij, u bë me qëllimin që të vinte “dikush që të bënte këto lojëra”.
Duhet të keni të qartë ju si gazetarë dhe çdo qytetar, se nuk ka një afat të caktuar në Kushtetutë për Presidentin e Republikës. Ka një afat për Parlamentin, sepse dihet që është një institucion kolegjial, por nuk kemi një afat për Presidentin. E dyta, Kushtetuta është mbi çdo gjë. Për herë të parë krijohet Gjykata Kushtetuese sipas Reformës dhe është tepër e rëndësishme që të respektohet Kushtetuta, aq më tepër Gjykata Kushtetuese. Çdo akt në këtë proces i Presidentit, i Parlamentit dhe institucioneve të përfshira, është historik sepse do mbetet si referencë në të ardhmen. Çdo veprim do të jetë precedent për të ardhmen. Duhet të kemi të qartë se Komisioni i Emërimeve në Drejtësi është një institucion, i cili merret vetëm me menaxhimin administrativ për të garantuar zbatimin e Kushtetutës. Kushtetuta tregon qartë se si krijohet Gjykata Kushtetuese. E thotë qartë që Presidenti ka të drejtë të emërojë vakancën e parë, pastaj Parlamenti dhe përsëri Presidenti. Është detyra e KED- së të rregullojë listat e vakancave, kritereve dhe afateve dhe të mos kemi përplasje midis institucioneve dhe nuk është e kundërta, që KED, i cili është institucion kolegjial, akoma më qartë që kryetari i KED- së të bëjë lojëra të karakterit administrativ, duke vendosur kohën kur duhet të dërgojë listat për Presidentin dhe Parlamentin, në një mënyrë të dyshimtë, për të mos thënë mafioze, që të vendosë kreun e shtetit në këtë pozitë që të shkelë Kushtetutën. E bllokuan krijimin e KED për dy vite, në mënyrë që të gjenin një kryetar si ky që bën lojëra”, tha Presidenti Meta.
KED
Gjithmonë i është kërkuar KED- së që të marrë të gjitha masat, që të mos vinim në një situatë të tillë, pra, të masave administrative dhe jo të jemi në një situatë, ku pothuajse të gjithë kandidatët janë të paracaktuar dhe mundësitë e zgjedhjes janë zero. Ka qenë një kërkesë e qartë zyrtare e Presidentit, që të mos kemi këtë situatë ku dërgohen në të njëjtën kohë dy vakanca në kohë të ndryshme, që i takonte Presidentit të Republikës. Nëse Presidenti do të vendoste në atë mënyrë siç donte të impononte kreu i KED- së, jo vetëm Presidenti do të bënte një shkelje të hapur të Kushtetutës, por njëkohësisht Presidenti, për shkak të numrit të kufizuar, mund të akuzohej nga Parlamenti, jo vetëm se shkeli Kushtetutën, por e la Parlamentin në pamundësi për të zgjedhur. Jo vetëm Presidenti ka komunikuar me KED shumë më herët sesa tani dhe çuditërisht pothuajse të njëjta lista që janë miratuar në të njëjtën ditë, i çon shumë ditë më vonë në Parlament. Edhe vetë Kuvendi nuk duhet ta vinte Presidentin në një institucion të vështirë, sepse Presidenti është një institucion jopartiak, ndryshe nga Kuvendi, që edhe po u shkel Kushtetuta, siç edhe ka ndodhur për fat të keq, është përgjegjësi kolektive. Ndërtimi i Gjykatës Kushtetuese është vënë kusht nga Bundestagu. Ndërtimi i Gjykatës Kushtetuese sipas Kushtetutës dhe jo sipas lojërave që synojnë kapjen e saj.
EMËRIMET
Radhitja nuk është rastësi, është për të ruajtur balancat sesi krijohet Gjykata Kushtetuese. Është e shprehur shumë qartë, që Presidenti nuk mund të bëjë dy emërime të njëpasnjëshme. Jemi në momentin që kemi katër vakanca. Dy të Presidentit dhe dy të Parlamentit, për të cilat duhen ruajtur balancat që ka parashikuar Kushtetuta. Kur ti si KED bën një proces dhe nga ky proces dalin shumë pak emra për gati po kaq vende, atëherë çdo zgjedhje që bën Presidenti ndikon edhe te listat e Parlamentit. Çdo gjë tjetër është një sofizëm dhe një marrëzi shumë e qartë që ka mundësi të lexojë Kushtetutën.
BETIMI
Besoj së jam shumë i qartë për këtë çështje. Institucioni i Kuvendit është i mirë mirëpritur të komunikojë me Presidentin, sikundër institucioni i Presidentit ka komunikuar me Kuvendin kur ka bërë plotësimin për vakancën e parë të z. Besnik Muçi dhe jemi të hapur për të bashkëpunuar në respekt të Kushtetutës dhe kjo është një çështje e mbyllur dhe shumë e qartë. Presidenti nuk e konteston zgjedhjen nga Parlamenti. Presidenti e dekretoi menjëherë kandidaturën e parë dhe çuditërisht Parlamenti e shtyu vendimin dy ditë përpara skadimit të afatit. Kemi të bëjmë me një rrethanë provokuese për Presidentin nga individë të caktuar nga ana e maxhorancës, që kanë keqpërdorur edhe kryetarin e KEDsë, sipas të gjitha provave, në mënyrë që Presidenti të vihej në këtë pozitë. Që ose Presidenti të firmoste të dyja vakancat dhe t’i thuhet që këtë nuk ta lejon Kushtetuta, ose t’i bëhet një interpretim përmes marrëzive të tilla, sepse ty të ka kaluar afati, sepse ne duam të rrëmbejmë atë anëtar që të takon. Parlamenti ka bërë edhe gjëra më të rënda dhe kjo nuk është gjëja më e rëndë. Nuk kishte pse të vepronte në këtë mënyrë me Presidentin, kur Presidenti e ka informuar KED- në dhe Avokatin e Popullit që monitoron të gjithë procesin. Presidentin askush nuk mund ta vendosë të bëjë një shkelje flagrante të Kushtetutës së Shqipërisë.
XHAFERLLARI
Unë nuk jam këtu për t’u marrë me thashetheme të turpshme që u takojnë vetëm njerëzve e politikanëve që nuk kanë asnjë lloj dinjiteti politik, familjar dhe shoqëror. Zonja Xhaferllari është një person tërësisht i diskriminuar dhe është një person që ka marrë vlerësimin zero, ndërkohë që i ka pasur kualifikimet më të larta si për shkollimin, ashtu dhe vlerësimet e tjera. Presidenti nuk merret me asnjë individ. Nëse nuk do kishte besimin tek asnjë individ, do të thoshte që nuk kam besim tek askush. Të përpiqesh ta banalizosh në histori të tilla kur bëhet fjalë për Gjykatën Kushtetuese, që asnjë ditë nuk duhej të ishte e mbyllur. Ua kam thënë edhe diplomatëve të korruptuar. Kemi bërë që edhe Gjykata Kushtetuese të përfshihet në veting dhe u kam thënë që asnjë ditë të mos kishte mungesë të Gjykatës Kushtetuese. Kjo ka ndodhur që në krye të KED- së të vinte një ushtar i verbër i partisë. Duhet të vinte një ushtar i partisë, që në kundërshtim edhe me statusin që ka, bën lojëra të tilla që të vendosë në pozitë kreun e shtetit që ose të shkelë Kushtetutën me pahir, ose me lojëra të tilla të turpshme, që as fëmijë rrugaçë nuk bëjnë që t’i rrëmbejnë Presidentit në mënyrë mafioze anëtarin e Gjykatës Kushtetuese, kjo është e vërteta. Nëse duan të vazhdojnë konflikte të tilla, do t’ia shtojnë më tej kushtet Shqipërisë gjatë këtij dimri. Boll jemi kërrusur nga kushtet, nuk duhet të rrëzohemi deri në pranverë. Ju duhet të dini se çfarë publikohet në Fletoren Zyrtare dhe këto janë shumë të qarta në ligj. Së dyti, çdo botim kontrabandë në Fletoren Zyrtare jashtë ligjit dhe çdo vendimi të çdo institucioni që mund të marrë vendime të tilla, pa dyshim që nuk sjell asnjë detyrim për Presidentin e Republikës në zbatim të detyrimeve të tij kushtetuese. Presidenti është shumë i qartë. Kështu që ka Kushtetutë mbi çdo gjë tjetër në Republikën e Shqipërisë në mënyrë të veçantë për Presidentin, që është betuar me dorë mbi Kushtetutë. Unë mbi këtë gjë nuk kam bërë e nuk bëj shaka. Kush mendon se mund të bëjë shaka, t’i bëjë dhe të marrë përgjegjësitë e tij.
SABOTIMI
Presidenti i Republikës, për t’ju treguar juve se nuk ka pasur dhe nuk do të ketë gjë më të rëndësishme për të që prej dy vitesh si President dhe një vit si Kryetar i Parlamentit, sesa krijimi i Gjykatës Kushtetuese. KED nuk u sabotua kot në 2017 dhe 2018, sepse duhet të vinte dikush që të bënte këto lojëra. Bundestagu e bëri të qartë që duhet të krijohet Gjykata Kushtetuese. Janë dhjetëra milionë euro nga Europa që në Shqipëri të kemi shtet ligjor. Ata nuk paguajnë që të kapet sistemi i drejtësisë, sepse e dinë që është më shumë krim, më shumë azil drejt këtyre vendeve.