SHBA, nisin seancat publike për shkarkimin e Presidentit
Ambasadori: Trump, më i interesuar për Biden sesa Ukrainën
Të mërkurën, në SHBA ka nisur seanca e parë televizive mbi hetimin e Dhomës së Përfaqësuesve për shkarkimin e Presidentit Donald Trump, nëse vërtetohet se ai ka abuzuar me detyrën.
Dy figura qendrore në procesin hetimor mbi Presidentin Trump janë të parët, që ofruan dëshmi në seancën publike. Kjo ishte hera e dytë që ata dalin para ligjvënësve, pas seancës me dyert ë mbyllura. Ata janë zëvendës ndihmës sekretari i Shtetit për Evropën, George Kent, dhe ambasadori amerikan në Ukrainë, William Taylor, dhe po u përgjigjen pyetjeve të ligjvënësve lidhur me kontaktet e Presidentit me udhëheqësin ukrainas, të cilat sipas demokratëve përbëjnë shkelje të autoritetit për përfitim politik personal. Gjatë seancës kanë ndërhyrë edhe aleatët e Presidentit. Shkarkimi i Presidentit Trump ishte parashikuar prej kohësh nga kritikët e tij, si përpara, ashtu edhe gjatë hetimit të bashkëpunimit me Rusinë. Mëngjesi u hap me kryetarin demokrat të Komitetit të Hetimit, Adam Schiff, i cili tha se e ardhmja e Republikës Amerikane ishte në ekuilibër dhe se Kongresi duhej të vepronte kundër “korrupsionit dhe abuzimit të pushtetit”. Ndërsa republikanët akuzuan demokratët për një luftë obsesive ndaj Presidentit, sa përfshiu përpjekjen për të marrë foto nudo të tij. Por demokratëve iu dha një fitore e hershme nga Taylor, një diplomat veteran dhe oficer i këmbësorisë në Vietnam, i cili tani është ambasadori amerikan në detyrë në Kiev, Ukrainë.
DËSHMIA E TAYLOR
Diplomati William Taylor bëri një deklaratë “bombë” në dëshminë e tij në televizion të mërkurën për hetimin mbi shkarkimin e Trump, duke folur për informacionin e ri që ai mori në lidhje me një ndihmës të stafit, i cili kishte dëgjuar Donald Trump- in duke diskutuar “hetimet” në një telefonatë me ambasadorin e SHBA- ve në BE, Gordon Sondland. Ai tha mëngjesin e parë të seancës dëgjimore publike të hetimit të shkarkimit, se Donald Trump ishte përshkruar nga ambasadori i tij si më i interesuar për hetimet e Biden sesa për Ukrainën. Informacioni i freskët erdhi më pak se dy orë pasi Kongresi hapi seancat dëgjimore publike për hetimin e shkarkimit, i cili duket se do të përfundojë me Presidentin që do të gjykohet në Senat. “Po ballafaqohesha me një linjë jozyrtare, të parregullt komunikimesh lidhur me Ukrainën, që nuk jepte llogari para Kongresit, një linjë që nuk respektonte praktikat e komunikimit përmes Departamentit të Shtetit. U bëra gjithnjë e më i shqetësuar nga operimet e kësaj linje, që përfshinte përfaqësuesin e Presidentit Trump për Ukrainën, Kurt Volker, ambasadorin amerikan në BE, Gordon Sondland, sekretarin e Energjetikës, Rick Perry, zyrtarin e Shtëpisë së Bardhë, Mick Mulvaney, dhe avokatin personal të Presidentit Rudy Giuliani”, tha Taylor. Ai vazhdoi të jepte hollësi të bisedave mes zyrtarëve në këtë linjë komunikimesh dhe kërkesave që ata kishin përcjellë udhëheqjes së Ukrainës. “U shqetësova”, tha Taylor duke shtuar se këto akte e kishin shtyrë deri pranë dorëheqjes.
DËSHMIA E KENT
Zëvendës ndihmës sekretari i Shtetit, George K ent, foli për rëndësinë e luftës kundër korrupsionit në Ukrainë, por ai u shpreh kritik ndaj praktikave të ndjekura, të cilat janë në qendër të hetimeve dhe që ai i përshkroi si akte që minojnë sundimin e ligjit. “Bazuar në parimet e përgjithshme, nuk besoj që Shtetet e Bashkuara duhet t’u kërkojnë vendeve të tjera të angazhohen në hetime apo ndjekje penale të përzgjedhura dhe me ngjyrim politik, ndaj kundërshtarëve të atyre që janë në pushtet, pasi akte të tilla të specifikuara minojnë shtetin ligjor, pavarësisht se me cilin vend bëhet kjo tentative”, tha Kent. Ai foli për “Burismën” dhe shqetësimet që kishin pasur zyrtarët amerikanë për korrupsion nga drejtuesi i kësaj kompanie, si dhe problemin e përfshirjes në bordin drejtues të kësaj kompanie të djalit të ish- nënpresidentit Joe Biden. Por ai theksoi se hetimet lidhur me shqetësimet për korrupsion duhet të zhvillohen nga institucione ligjore dhe jo përmes presionit nga zyrtarë individualë. Në mbyllje të dëshmisë së tij, ai veçoi shqetësimet lidhur me veprimet e avokatit Rudy Giuliani për të diskredituar “diplomatë amerikanë” dhe shprehu tronditjen që kishte ndierë, kur këto përpjekje çuan në largimin nga detyra të ambasadores amerikane në Ukrainë, Marie Yovanovitch.