Ambasadori italian: T'i kërkohet një mendim Komisionit të Venecias

Ambasadori i Italisë në Tiranë, Alberto Cutillo, ka komentuar përplasjen e fundit mes Parlamentit dhe Presidentit për të zgjedhur një nga anëtarët e Gjykatës Kushtetuese. Sipas tij, për zgjidhjen e këtij ngërçi, duhet të merret mendimi i Komisionit të Venecias, ndërsa ka shtuar se Gjykata Kushtetuese duhet të ngrihet sa më parë. "Duhet të jetë në funksion sa më të shpejtë, dhe në bazë të ligjit dhe procedurave. Ka një debat për kompetencat, por që duhet të bashkëpunojnë për një zgjidhje që të jetë e mirëpritur. T'i kërkohet një mendim Komisionit të Venecias. Besoj është e rëndësishme të kemi një rrugëtim për çdo dyshim për këtë Gjykatë. Mund të bëhet shumë shpejt. E rëndësishme është që të bjerë poshtë çdo lloj dyshimi. Ky është sugjerim personal", deklaroi ambasadori Cutillo. Më tej, ai kërkoi më shumë bashkëpunim mes Shqipërisë dhe vendit që ai përfaqëson sa i përket luftës kundër krimit të organizuar. "Sekuestrimet e pasurive të krimit janë efikase dhe shpresoj të bëhen edhe në Shqipëri. Është shumë e rëndësishme që Shqipëria dhe Italia të bashkëpunojnë së bashku në lidhje me këtë. Nuk i njoh zhvillimet e fundit për Kushtetuesen, por unë them se është thelbësore për shumë vende edhe në Shqipëri", tha Cutillo. Që prej datës 8 nëntor, kur sipas maxhorancës Presidentit i skadoi afati për të zgjedhur anëtarin e dytë të

Gjykatës Kushtetuese, ka nisur një debat mes Presidentit dhe Parlamentit për radhën e zgjedhjes së anëtarëve. Ditën e hënë, Parlamenti zgjodhi dy anëtarët e tij në një ditë, ndërkohë që sipas kreut të shtetit procedura në Kushtetutë e përcakton që për të plotësuar Gjykatën Kushtetuese, radha e zgjedhjes është Presidencë, Parlament Gjykatë e Lartë. Kjo radhë përsëritet tri herë derisa të plotësohen vakancat.