Meta: Le të jetë kjo një ditë për të reflektuar
Presidenti në Mamurras: Pasojat e tërmetit ende s'kanë kaluar
Në këto momente të vështira, kur pasojat e rënda që la pas tërmeti tragjik ende nuk janë tejkaluar, duhet të jemi në radhë të parë më pranë atyre që kanë nevojë për më shumë kujdes, dashuri dhe përfshirje sociale
Në një ditë të shenjtë për të gjithë besimtarët ortodoksë dhe katolikë, kreu i shtetit ka përçuar mesazhin për reflektim dhe shpresë. Presidenti Ilir Meta vizitoi dje Qendrën Sinodike të Katedrales Ortodokse "Ngjallja e Krishtit", nga ku uroi edhe të gjithë besimtarët për Krishtlindje. "Ishte kënaqësi e veçantë për të uruar Fortlumturinë e Tij, kreun e Kishës sonë Ortodokse, për këtë ditë shprese të bekuar. Njëkohësisht, për të uruar të gjithë besimtarët ortodoksë, por edhe të krishterë shqiptarë. Le të jetë kjo një ditë shprese, një ditë solidariteti, për të reflektuar edhe më shumë, për të kthyer sytë dhe për të shtrirë dorën ndaj atyre që kanë nevojë për më shumë ndihmë, mbështetje dhe përfshirje në shoqërinë tonë. Që kanë nevojë për më shumë ngrohtësi dhe dashuri, në mënyrë që të kemi një Shqipëri më të qëndrueshme, më njerëzore, më dinjitoze dhe më të begatë!", tha Presidenti. Më pas, Presidenti Ilir Meta udhëtoi për në Mamurras, për të festuar Krishtlindjen me banorët e prekur nga tërmeti i 26 nëntorit. Nga atje, Meta vuri në dukje se pasojat e lëkundjeve nuk kanë kaluar. "Në këto momente të vështira, kur pasojat e rënda që la pas tërmeti tragjik ende nuk janë tejkaluar, duhet të jemi në radhë të parë më pranë atyre që kanë nevojë për më shumë kujdes, dashuri dhe përfshirje sociale, për t'u dhënë shpresë, kurajë dhe gëzim, për të punuar të gjithë së bashku në mënyrë që Krishtlindjet e tjera t'i kremtojmë si gjithmonë nën një atmosferë festive dhe gjithëpërfshirëse", tha Presidenti. Ndërkohë, më herët gjatë ditës së djeshme, Presidenti Meta takoi Kryepeshkopin e Kishës Ortodokse të Shqipërisë, Anastas Janullatos. Ky i fundit i dhuroi kreut të shtetit një kopje të albumit "Ngjyrat e Ortodoksisë". "I lumtur në këtë ditë të bekuar të merrja si dhuratë nga Kryepeshkopi Anastas Janullatos kopjen e parë të albumit ' Ngjyrat e Ortodoksisë', një prezantim jashtëzakonisht dinjitoz i vlerave të gjithanshme të Kishës sonë Ortodokse, të trashëgimisë dhe historisë, por edhe ringritjes dhe arritjeve të saj", shkroi Meta në një postim në "Facebook".