Mustafa i përgjigjet Kurtit: Negociatat s’kanë dështuar
“Ka dështuar vetëm strategjia e VV për të fajësuar LDK- në”
Kreu i LDK- së, Isa Mustafa, i është përgjigjur liderit të Lëvizjes Vetëvendosje, Albin Kurti, mbi dështimin e marrëveshjes. Sipas Mustafës, nuk kanë dështuar negociatat, siç u tha nga Kurti, por strategjia e VV- së. Në një reagim të gjatë në rrjetin social “Facebook”, Mustafa shkruan mes të tjerash se “Negociatat nuk kanë qenë të lehta dhe partneri në tavolinë, Lëvizja Vetëvendosje, në disa raste, i ka shpërfillur rregullat, për të cilat kishim rënë dakord. Të tillë e kam parë VV- në edhe sonte me video- mesazhin e Kryetarit të Vetëvendosjes, z. Albin Kurti”. Duke komentuar përmbajtjen e mesazhit të Kurtit, Mustafa theksoi se: “Për LDKnë dhe për mua, negociatat nuk kanë dështuar. Ka dështuar strategjia e Vetëvendosjes për ta siguruar para publikut epitetin e palës parimore dhe gjeneroze në negociata dhe për t’ia hedhur fajin LDK- së. Asnjë prej kërkesave tona nuk mund dhe nuk duhet të trajtohet si kërkesë ndaj Vetëvendosjes, për shkak se Vetëvendosja nuk i ka fituar të gjitha përgjegjësitë, ajo ka fituar rreth 1/ 4 e votave...”. Kreu i LDK- së kujtoi se VV ka vetëm një deputet më shumë dhe u zotua se do të vazhdojë negociatat. “LDKja dhe unë do të vazhdojmë të punojmë për ta bërë ndryshimin e kërkuar nga qytetarët e Kosovës më 6 tetor. Natyrisht, jo duke shpërfillur përpjekjet për ta lënë LDK- në fajtore për ambiciet përtej legjitimitetit qytetar të Lëvizjes Vetëvendosje... Ndryshe nga deklarimet e tyre publike, Vetëvendosja tregoi sonte se është gati të zotohet për ta mbështetur kandidatin e propozuar nga LDKja për President të Kosovës, vetëm se kërkon më shumë hise në qeveri. Ky nuk është parim, por tentim për të përfituar më shumë. Ne mendojmë se ndarja e balancuar e përgjegjësive, konform rezultatit të zgjedhjeve, rezulton në këtë formulë, Kryetari i Kuvendit, Presidenti, kur të mbetet pozita e lirë, dhe gjysma e qeverisë duhet t’i takojnë LDK- së, nëse Vetëvendosje dëshiron mbështetjen e LDK- së për t’ia besuar asaj drejtimin e ekzekutivit dhe gjysmën e Qeverisë. Ndryshe, marrëveshja do të ishte e pabalancuar dhe nuk do të siguronte stabilitet qeverisës, as funksionim demokratik të institucioneve kryesore. Vetëvendosja ka filluar ta kuptojë këtë dhe shpresoj që në ditët në vazhdim, do të ulemi dhe do t’i definojmë të gjitha aspektet. E drejta dhe detyrimi kushtetues i takojnë të parit, ashtu si dhe përgjegjësi për të gjetur zgjidhje dhe për t’i ndërtuar institucionet e reja. Ne jemi gati për negociata”, përmbylli mesazhin tij Isa Mustafa.